Ushbu ruknimizdagi eng so‘nggi yangiliklar bilan tanishtirishda davom etamiz.
«Real» tanlaydi!
Madridning «Real» klubi ikki hujumchidan birini tanlashi lozim.
“Calciomercato” nashrining ma’lum qilishicha, Zidan Borxa Mayoralni klubda salqab qolishni istamoqda. Luka Yovichni esa, ijaraga berib yuborilishiga qarshi emas.
Manbaning ma’lum qilishicha, «Real» 23 yoshli ispan hujumchisiga tez orada yangi shartnoma taklif qiladi.
«Chelsi» Zumani sotmoqchi emas
Londonning «Chelsi» klubi Kurt Zuma bilan qiziqib qolgan jamoalar uchun transfer summasini ma’lum qildi.
“Sky Sport” nashrining ma’lum qilishicha, 25 yoshli futbolchini «Chelsi» 36 million funtdan kamiga sotmoqchi emas.
Manbaning ma’lum qilishicha, himoyachi uchun asosiy da’vogar «Everton» klubi bo‘lib turibdi.
«Tottenhen» noiloj variantda to‘xtaydimi?
Londonning «Tottenhem» klubi markaziy hujumchi sotib olish borasida keng qamrovli ish olib bormoqda.
“The Sun” nashrining ma’lum qilishicha, «shporlar» bosh murabbiyi – Joze Mourinyo Kristian Bentekeni o‘z jamoasida ko‘rishni istamoqda.
«Kristal Pelas» futbolchisi London klubiga o‘tishga qarshi emas. Boz ustiga, «muz burgutlari» bilan o‘rtadagi shartnoma mavsum yakunida yakuniga yetadi.
Manbaning ma’lum qilishicha, «Tottenhem» hujumchi uchun 5-10 million yevro atrofida pul taklif qilmoqchi.
Mendesh ishga kirishdi
Taniqli futbol agenti Jorjo Mendesh o‘z mijozi – Tomi Lemarning xizmatlarini «Vulverhempton»ga taklif qilmoqda.
Bir hafta ilgari Mendesh Sameduning transferini amalga oshirishda faol ishtirok etgan edi.
Ingliz nashrlarining ma’lum qilishicha, Lemarning yiliga 6 million yevro talab qilayotgani «bo‘rilar»ga manzur kelmayapti.
PSJ Alli variantidan voz kechdimi?
«Tottenhem» jamoasi yarim himoyachisi Dele Alli faoliyatini PSJda davom ettirishi mumkin.
“The Sun” nashrining ma’lum qilishicha, Parij klubi 24 yoshli futbolchini bir mavsumga ijaraga olishga tayyor. Bundan tashqari, futbolchining bor maoshini ham klub to‘lab beradi.
«Tottenhem» jamoasi bu taklif borasida qarorini tez kunlarda rasman e’lon qiladi.
