Yaqindagina Tvitter ijtimoiy tarmog‘ida yangi fleshmob start oldi. «Hammasi nimadan boshlandi - hozir qanday ahvolda» deb nomlagan fleshmobning sharti juda oddiy. Barcha, boshlangan ish va uning yakuni aks etgan suratlarni tarmoqqa joylamoqda.
Bunday imkoniyatni futbol klublari ham qo‘ldan boy berishni istamadi. Birinchilardan bo‘lib «Barselona» ishga kirishdi. Kataloniya klubi Leo Messining «La Masiya»ga qabul qilingani haqidagi kartochkasi va «Oltin to‘p»lar aks etgan suratni namoyish etdi.
Ko‘p o‘tmay «qizil iblislar» ham ishga kirishdi. Jamoa Markus Reshfordning evolyusiyasini ko‘z-ko‘z qildi. «Liverpul» esa, vaziyatdan unumli foydalandi. Kloppning «Liverpul» bilan shartnoma imzolaganini klubning rasmiy akkaunti ajoyib tarzda namoyish etdi. Suratda, «Enfild»ga ilk bor kelgan Yurgen va 30 yillik tanaffusdan so‘ng APL chempionligini qo‘lga kiritgan Yurgenlar aks etgan. «Liverpul»ning qo‘shnisi, «Everton» ham bir chetda qolishni istamadi. «Irislar» o‘z hujumchisi Dominik Kelvert-Lyuin qay darajada tez o‘sib borayotganini namoyish etdi. Shuningdek, klub o‘z futbolchisi terma jamoa safida gol urayotganiga ham shama qilib o‘tdi. Germaniya klublaridan «Borussiya Dortmund» birinchilardan bo‘lib vaziyatga aralashdi. Klub o‘z sardori Marko Roysning sodiqligini yana bir bor namoyish etishga qaror qildi. Suratda Akademiyaga endi qabul qilingan bolakayning sardor darajasiga ko‘tarilgani aks etadi.
Turin super klubi esa, ortiqcha kreativlik namoyish etib o‘tirmadi. Shunchaki, Buffon! Kilian Mbappe ham bu fleshmobdan chetda qolishni istamadi. Bir qarashda tushunarsiz, biroq buning o‘ziga xos tarixi mavjud. Futbolchining aytishicha, uning golni nishonlash uslubi aslida ukasiga tegishli. Mbappe esa, bu nishonlash qay darajada ommalashganini «FIFA 21» simulyatori misolida namoyish etmoqda. Fleshmobga qiziqish ortgach, Alfonso Devis ham ishga kirishdi.
Hatto, turli videoo‘yinlar ishlab chiqaruvchi EA Sports ham chetda qolmadi. Ular «FIFA 97» - «FIFA 21»ni solishtirish orqali qay darajada progress bo‘lganini namoyish etishdi. Oston O‘runovning jamoasi ham bundan chetda qolishni istamadi. «Spartak» Henrik Larssonning o‘g‘li Jordan Larssonning qisqa vaqtda futbol yulduziga aylanganini ko‘rsatishga urinib ko‘rdi. Beylning ortga qaytgani «Tottenhem»ga qo‘l keldi desak, adashmagan bo‘lamiz.
Aks fleshmobda «shporlar» aytarli hech narsa bilan maqtana olmas edi. «Real Madrid» esa, «el-kapitano»ning Madriddagi ilk kuni va bugungi bilan solishtirdi. Tan olish lozim, Ramos ushbu vaqt mobaynida juda ko‘p sovrinlarga ega chiqdi.
