Coca Cola Superligasining 20-turidan o‘rin olgan “So‘g‘diyona” – “Navbahor” (1:0) jamoalari o‘rtasidagi uchrashuvdan keyingi matbuot anjumanining birinchi qismida “So‘g‘diyona”bosh murabbiyi Ulug‘bek Baqoyev ishtirok etib, jurnalistlarning savollariga javob berdi.
Jizzaxliklar ustozining o‘yin haqida fikrlari quyidagicha bo‘ldi.
- Bugun ikkita teng kuchli jamoalar o‘zaro o‘ynashdi. Birinchi bo‘limda bir nechta vaziyatlar yaratdik, amma raqib posboni yaxshi harakat qildi. Ikkinchi bo‘limdagi o‘yin esa biroz pala-partish tarzda kechdi. Har ikki jamoa a’zolari ham hujumlar uyushtirishdi. Yigitlarni g‘alaba bilan tabriklamoqchiman. Endi keyingi o‘yinlarga tayyorgarlik ko‘ramiz.
- Uchrashuv davomida hakamlarga ko‘p e’tiroz bildirdingiz. O‘yinda bahsli vaziyat ham bo‘ldi. Bugungi hakamlikka qanday baho berasiz?
- O‘sha vaziyatda biz o‘zgarishni amalga oshirishga tayyor edik. Biroq Nasimovning zaxiradan maydonga tushishi 5 daqiqaga cho‘zilib ketdi. Tushunishimcha, elektron tablo ishlamay qolgandi. Qahramonovning vaziyatida esa u qadar keskin narsa bo‘ldi, deb o‘ylamayman.
- Milan Mitrovich so‘nggi o‘yinlarda ko‘rinmay qoldi...
- U koronavirus yuqtirib olgandi. Kasallikdan tuzaldi va keyingi bahsga tayyor bo‘ladi.
- Eshitishimizga qaraganda, Mitrovich Serbiyaga uchib ketgan ekan...
- Ha, u Serbiyaga uchib ketgandi. O‘sha yerda kasallik aniqlandi va davolanib yurtimizga qaytib keldi.
