Coca-Cola Superligasi 21-turidan o‘rin olgan «Andijon»-«Qizilqum» (0:0) uchrashuvidan so‘ng "Andijon" jamoasi bosh murabbiyi Baxtiyor Hamidullayev matbuot anjumanida ishtirok etdi.

— Bugun juda og‘ir o‘yin bo‘ldi. Bugun g‘alaba qozonishimiz shart edi, lekin oldingi turda uchralgan yirik mag‘lubiyatning yigitlarga bo‘lgan ta’siri bugungi o‘yinda ham sezildi. Bugungi o‘yinda yaxshi vaziyatlar deyarli sodir etolmadik. Yigitlar 2-3 tur oldingi o‘yinlarini ko‘rsatisha olishmadi.

— Bugun g‘alabaga, aytganingizdek jamoani xarakteri yetmadi. Demak, shundan kelib chiqib aytadigan bo‘lsak bugungi natijadan qoniqdingizmi?
— Yo‘q. Bugun Superligamiz doirasida "Sog‘lom avlod" o‘yingohidagi so‘ngi o‘yinimiz edi, bugun g‘alaba qozonishimiz shart edi. Yigitlarda shijoat, g‘alabaga bo‘lgan ishtiyoqni ko‘rmadim.

— Maydon markazida o‘yin yaxshi tashkillashtirilmayotgani sababi nimada deb o‘ylaysiz?
— Markazda Abdulloh Olimovni ham sinab ko‘ryapmiz, u ham jarohatidan to‘liq tiklanib ulgurmagan. Doniyor Abdumannopov ham kecha belidan jarohat olgan edi, u ham safdan chiqdi, darvozabonimiz Aslan Ahrorov ham safdan chiqdi. Bugun markazda ham xech narsa o‘xshamadi, hujumda ham o‘xshamadi, faqatgina himoyachilarimiz va darvozabonimiz yaxshi o‘yin ko‘rsatdi.

— So‘nggi turlar markazlashgan holda o‘tkazishini inobatga olib, jamoangiz ligada qolish uchun kurashayotgan paytida bu sizga muammo tug‘dirmaydimi?
— Bugun menda muammo ko‘p paydo bo‘ldi. Keyingi uchrashuvda ko‘proq yosh futbolchilarni maydonga tushiraman, bunday futbolchilar menga kerak emas!