Professional boksda o‘z faoliyatini davom ettirayotgan Shohjahon Ergashev (18-0, 16 KO) 16 noyabr, dushanba kuni navbatdagi jangini o‘tkazadi.

O‘zbekistonlik bokschiga belaruslik Dmitriy Milyusha (9-3-1, 4 KO) raqiblik qiladi. Jang 16 noyabr kuni Rossiyaning Krasnogorsk shahrida bo‘lib o‘tadi. Jang Shohjahon faoliyat yuritadigan super yengil vaznda emas, yarim o‘rta vazn toifasida kechadi.

Shuningdek, ushbu boks kechasida yana ikki nafar o‘zbekistonlik sportchi ringga ko‘tariladi. Mirzakamol Ne’matov (1-0, 1 KO) prof ringdagi ikkinchi jangini rossiyalik Alisher Ashurovga (3-26) qarshi o‘tkazadi. Alisher Shodiyev (1-1) esa mahalliy bokschi Magomedriza Mutalibovga (1-1) qarshi jang qiladi.

Shohjahon Ergashev ishtirokidagi jang 16 noyabr, dushanba kuni tungi soat 23:30 da boshlanishi kutilmoqda (jangning erta yoki kech boshlanishi boshqa janglarning to‘liq o‘tishi yoki muddatidan avval yakunlashiga bog‘liq).


Shohjahon so‘nggi jangini 2020 yilning yanvarida o‘tkazib, unda meksikalik Adrian Estrellani (29-5, 24 KO) birinchi raunddayoq nokautga uchratgandi.

Ma’lumot uchun, Shohjahon Ergashev hozirga qadar prof boksdagi barcha 18 ta jangida g‘alaba qozongan. 16 ta jangda raqiblarini nokaut evaziga taslim qilgan.