«Milan» yarim himoyachisi Hoqon Cholhono‘g‘lu faoliyatini «Manchester Yunayted»da davom ettirishi mumkin. 26 yoshli futbolchi 2021 yilning yozida katta ehtimol bilan mankunianliklar safiga o‘tadi. Bu haqda "Sport Bild" jurnalisti Kristian Falk xabar tarqatdi.

«Milan» turkiyalik futbolchi bilan yangi shartnoma borasida hali muzokara boshlamadi. Uning shartnomasi joriy mavsum so‘ngida yakuniga yetadi. Shu tariqa, Cholhono‘g‘lu yanvar oyidan boshlab boshqa jamoa bilan muzokara boshlash huquqiga ega bo‘ladi.

«Bizdagi ma’lumotlarga qaraganda, «Manchester» va Cholhono‘g‘luning agentlari o‘rtasidagi dastlabki muzokaralar shu yilning yozida bo‘lib o‘tgan. Tomonlar bu borada ancha oldinga qadam tashlashdi. «Milan» esa yozgi transfer oynasining so‘nggi kunida «Yuventus»dan tushgan taklifga rad javobini berdi.

Hozirda hamma gap futbolchi oladigan maoshga bog‘liq. Cholhono‘g‘lu kelasi yilning yozida erkin agentga aylanishi futbolchi uchun katta ustunlik hisoblanadi», – deya yozdi Falk.