Londonning «Arsenal» klubi yozda Fransiyaning «Sent-Etyen» himoyachisi Vilyam Salibani Yevropaning eng iqtidorli futbolchilaridan biri sifatida o‘z safiga qo‘shib olgandi. Ushbu transfer uchun londonliklar 30 million funt ham sarf qilishgandi.
Biroq, futbolchi "Arsenal" klubiga ko‘chib o‘tganidan beri, hali biror marotaba ham APL doirasidagi uchrashuvlarda maydonga tushmadi. Hattoki, uni Yevropa Ligasi uchun ro‘yxatdan ham o‘tkazishmadi.
Angliya matbuotining yozishiga qaraganda, «Arsenal» Salibani yanvar oyida ijaraga berib yuborish variantini ko‘rib chiqmoqda. Londonliklar futbolchi Chempionshipga ko‘chib o‘tishini xohlamoqda. Ularning fikricha, futbolchiga Britaniya futbolidagi qiyin o‘yin tajribasi yetishmayapti. O‘z navbatida, Saliba ham unga bo‘layotgan munosabatni tushunmayapti va Fransiya chempionatiga qaytib ketishga qarshi emasligini yashirmayapti.
