O‘zbekiston kubogining 1/8 finalidan o‘rin olgan “Oq-tepa” – “Navbahor” (0:2) uchrashuvidan so‘ng, “Oq-tepa” jamoasi rahbari Alisher Shog‘ulomov o‘z fikrlarini bildirib o‘tdi.

"Ko‘rdinglar, ajoyib muhit ostida o‘yin bo‘lib o‘tdi. Ko‘p yosh futbolchilarimizni sinovdan o‘tkazib oldik. Ular o‘zlaridan yomon taassurot qoldirishmadi. O‘zimizning o‘yinimizni ko‘rsatishga harakat qildik, bir qator vaziyatlardan foydalana olmadik. Baribir, “Navbahor”ning mahorat bobida ustun ekanligi ko‘rinib turdi. Tarkibida Aziz Turg‘unboyev, Igor Golban kabi futbolchilari bor.  Raqibni g‘alaba bilan tabriklaymiz.

Bilasiz, jamoamizga tajribali futbolchilarni taklif qilmaganmiz. Tarkibdagi o‘yinchilar bilan mavsumni o‘tkazdik. Futbolchilar orasidagi farq sezildi, baribir. Uslubimiz paslar bilan o‘ynash, himoyadan hujumga paslar bilan chiqish.

Ispaniyalik murabbiy kelmasidan avval ham shu futbolni o‘ynayotgandik. U ham bunga o‘z hissasini qo‘shmoqda. Keyingi yil jamoani to‘liq yoshartiramiz. Jamoamizga bir necha futbolchilarni jalb qildik. Argentinadan futbolchi taklif qilganmiz. Uning masalasi 60 foiz hal bo‘lgan.

Bu yilgi Pro-liga bahslari juda qiziqarli o‘tdi. “Neftchi” – “Turon” o‘yinidagi vaziyatga munosabatim shunday, u yerda muxlislarning aybi bo‘lmadi. Fikrimcha, mojaro ”Neftchi”ning yoshi katta futbolchilarining aybi bilan bo‘ldi. Mansur Saidov, Dilyorbek Ermatov vaziyatni  nazorat qilishlari kerak edi. Yoshlar qiziqqon, baribir. Hissiyot, jahl bo‘lgan taqdirda yoshi kattalar qayerga qarayotgandi? O‘yinchilarni tinchlantirib, kiyinish xonasiga olib kirishi kerak edi.

Ushbu vaziyatda yoshlarni tinchlantirish maqsadga muvofiq bo‘lardi. Farg‘onadagi muhitda futbol o‘ynash har bir futbolchining orzusi hisoblanadi. “Turon”ni Superligaga yo‘llanma olgani bilan tabriklayman", — dedi Shog‘ulomov.

“Navbahor” PFK matbuot xizmati.