Ўзбекистон кубогининг 1/8 финалидан ўрин олган “Оқ-тепа” – “Навбаҳор” (0:2) учрашувидан сўнг, “Оқ-тепа” жамоаси раҳбари Алишер Шоғуломов ўз фикрларини билдириб ўтди.

"Кўрдинглар, ажойиб муҳит остида ўйин бўлиб ўтди. Кўп ёш футболчиларимизни синовдан ўтказиб олдик. Улар ўзларидан ёмон таассурот қолдиришмади. Ўзимизнинг ўйинимизни кўрсатишга ҳаракат қилдик, бир қатор вазиятлардан фойдалана олмадик. Барибир, “Навбаҳор”нинг маҳорат бобида устун эканлиги кўриниб турди. Таркибида Азиз Турғунбоев, Игорь Голбан каби футболчилари бор.  Рақибни ғалаба билан табриклаймиз.

Биласиз, жамоамизга тажрибали футболчиларни таклиф қилмаганмиз. Таркибдаги ўйинчилар билан мавсумни ўтказдик. Футболчилар орасидаги фарқ сезилди, барибир. Услубимиз паслар билан ўйнаш, ҳимоядан ҳужумга паслар билан чиқиш.

Испаниялик мураббий келмасидан аввал ҳам шу футболни ўйнаётгандик. У ҳам бунга ўз ҳиссасини қўшмоқда. Кейинги йил жамоани тўлиқ ёшартирамиз. Жамоамизга бир неча футболчиларни жалб қилдик. Аргентинадан футболчи таклиф қилганмиз. Унинг масаласи 60 фоиз ҳал бўлган.

Бу йилги Про-лига баҳслари жуда қизиқарли ўтди. “Нефтчи” – “Турон” ўйинидаги вазиятга муносабатим шундай, у ерда мухлисларнинг айби бўлмади. Фикримча, можаро ”Нефтчи”нинг ёши катта футболчиларининг айби билан бўлди. Мансур Саидов, Дилёрбек Эрматов вазиятни  назорат қилишлари керак эди. Ёшлар қизиққон, барибир. Ҳиссиёт, жаҳл бўлган тақдирда ёши катталар қаерга қараётганди? Ўйинчиларни тинчлантириб, кийиниш хонасига олиб кириши керак эди.

Ушбу вазиятда ёшларни тинчлантириш мақсадга мувофиқ бўларди. Фарғонадаги муҳитда футбол ўйнаш ҳар бир футболчининг орзуси ҳисобланади. “Турон”ни Суперлигага йўлланма олгани билан табриклайман", — деди Шоғуломов.

“Навбаҳор” ПФК матбуот хизмати.