Ayi kunlarda «MYU» bosh murabbiyi Ole Gunnar Sulsher iste’fosi to‘g‘risida juda ko‘p xabarlar aylanmoqda. Rahbariyat unga berayotgan ishonchi borga sari kamayib bormoqda. Darhaqiqat, norvegiyalik murabbiy qo‘l ostida «qizil iblislar»ning so‘nggi o‘yinlari borga sari beqarorlashib ketyapti.
Endi «MYU» avvalgi shonli tarixiga qaytmoqdami deganimizda yana klub o‘sha yomon formasiga tushib olib, muxlislarning dilini xira qilyapti. Ayniqsa, jamoa YECHLda so‘nggi 9 ta bahsning 5 tasida yutkazib bu borada klub tarixidagi antirekorni o‘rnatdi. Biz esa borgan sari o‘z kursisi qimiqlab borayotgan Sulsher agar iste’foga chiqariladigan bo‘lsa bosh postga ko‘rilayotgan eng yaqin nomzodlar haqida gaplashamiz.
Andre Villash-Boash
Biz ushbu murabbiyni bir qancha grand klublardagi omadli yurishlari bilan yaxshi eslab qolganmiz. «Portu» bilan Yevropa Ligasi va mamlakat chempionligini yutgandan so‘ng portugaliyalik murabbiy Angliyaga ko‘chib o‘tishga qaror qiladi. Garchi vatandoshi Mourinyoning bu yerda amalga oshirgan ulkan o‘zgarishlarini takrorlay olmagan bo‘lsada Villash-Boash bir marta Yevropaning kuchli murabbiylari ro‘yxatiga kiritildi. Har qalay jamooda o‘sish kuzatilmagan bo‘lsada darajasi pastlab ketmadi. Lekin biz «aristokratlar» safida uning aytarli muvaffaqiyatli onlarini eslay olmaymiz. Jamoa tarixida undan keyingi Roberto Dimateo amalga oshirgan missiya shunchaki Adrening g‘alabalarini ko‘mib qo‘ygan desak ham bo‘laveradi.
Porugaliyalik mutaxassisning muxlislar yodida yaxshi eslanadigan zafarlari asosan londonning boshqa bir klubi «Tottenhem»da kechgan. «Shporlar» uning davrida garchi kuchli to‘rtlikka kirishni uddalay olmagan bo‘lsalarda mavsum yakuniga qadar 72 ochko jamg‘arib, Premyer-liganing yangi rekordini o‘rnatishadi. Juda qisqa davri mobaynida u bir marta hatto oyning eng yaxshilari qatoridan joy olishga ham ulgurdi. Shundan ham o‘sha yillari musobaqadagi kurash qanchalar qizg‘in ketganini bilsak bo‘ladi. Keyinchalik esa rahbariyat Garet Beylni shov-shuvli transfer evaziga «Real»ga qo‘yib yuborgach, Villash-Boashning ham taqdiri «Tottenhem»da o‘z nihoyasiga yetdi. U shundan keyin bir muddat «Zenit» hamda «Shanxay» klublarida faoliyat olib bordi. Bugun esa Fransiyaning tarixiy klublaridan biri «Marsel»da ishlamoqa. Bu yerda u yaratgan muhitni yomon deb bo‘lmaydi. Jamoa 7 yil deganda ilk marta YECHL yo‘llanmasini qo‘lga kiritdi. Joriy mavsumda ham marselliklar chempionat peshqadamlarini izma-iz ta’qib etib kelishmoqda. Villash-Boash balki shaxmatcha murabbiylar sirasiga kirmas, lekin u zamonaviy futbolda o‘z uslubiga ega va ayni damda o‘ziga bo‘lgan ishonchni qayta tiklab olishi uchun «MYU» unga yaxshigina variant, har qalay Angliya begona emas.
Tomas Tuxel
«Qizil iblislar» bosh postiga da’vogarlar orasida Tuxel nomi ham bor. Garchi germaniyalik mutaxassisning Parij klubi bilan ishlari juda yomon ketmayotgan bo‘lsada uning shartnoma muddati kelasi yilning yozida yakuniga yetadi. Biroq biz hozirgi «PSJ»ning holatini ko‘rib avvalgi o‘yinlariga qaraganda biroz pasayish bo‘layotganligini sezamiz. Bu balki Fransiya ichki chempionatlarida bilinmasligi mumkin, ammo xalqaro maydonlarda jamoa amaldagi finalchiga xos o‘yin namoyish eta olmayapti. Barcha musobaqalardagi so‘nggi 3 bahsni oladigan bo‘lsak fransuz klubi raqiblari darvozasini biror marta ham ishg‘ol eta olishmadi. Bunaqasi klub tarixida 2011 yildan beri kuzatib kelinayotgan ilk antirekord hisoblanadi. Tuxel esa o‘zining omadsiz seriyalarini to‘xtatish va karyerasidagi yangi havoni his etish uchun ham balki Angliyaga yo‘l olib ko‘rishi balki to‘g‘ri bo‘lib chiqar.
Zero, unga grand jamoalarda ishlash begona emas. Dastlab biz bilganTuxelning muvaffaqiyati Dorutmundning «Borussiya»sida boshlangan. 2017-18 yilgi mavsumda u boshliq «asalari»lar kuchli «Bavariya» qarshiligini sindirib, yakunda Germaniya kubogini yutib chiqqan. Keyinchalik Fransiyaga ko‘chib o‘tgan murabbiy «PSJ» bilan ketma-ket ikki marta «Liga 1»da g‘olib bo‘ldi va o‘tgan Chempionlar ligasining esa finaligacha yetib bordi. Joriy mavsumda ham garchi guruhidan qiyinchilik bilan pley-offga chiqqan bo‘lsada, jamoaning nomi hozirda musobaqaning favoritlari qatorida tilga olinmoqda.
Yulian Nagelsman
Nagelsman yosh va tajribasiz murabbiydek ko‘rinishi mumkin, lekin u qisqa faoliyati davomida o‘zining nimalarga qodir ekanini barchaga isbotlab bo‘ldi va bejizga bugungi kunda bir nechta grand klublardan takliflar olayotgani yo‘q. Uning uslubi haqiqiy nemischa futbol ustiga quriladi, so‘nggi himoyachidan tortib markaziy hujumchilargacha bu yerda kuchli pressingga ishlashadi. Dastlabki faoliyatini «Hoffenhaym»da boshlagan nemis mutaxassisi jamoani tarixida birinchi marta Chempionlar ligasiga olib chiqadi. Keyinchalik mashhur bo‘la boshlagan murabbiyning xizmatlariga «Leipsig» qiziqish bildiradi va u «buqalar» safida 2019 yildan beri ishlab kelmoqda. Bu vaqt oralig‘ida jamoa Bundesligada ikki marta kuchli uchlikka kiradi va o‘tgan mavsum YECHL yarim finaligacha yetib bordi. Ushbu natijani qayd etganda u bor yo‘g‘i 32 yosh edi. Nagelsman boshliq jamoa joriy mavsum aynan «MYU» bilan bitta guruhdan joy olgandi va yakunda ularni Yevropa ligasi sari ravona qilib yubordi. Balki shuning uchun ham bo‘lsa kerak, Manchester rahbariyati nemis murabbiyining garchi «Leipsig» bilan 2023 yilgacha shartnoma tuzganiga qaramay uni Sulsher o‘rniga ko‘rilayotgan bosh nomzodlar qatorida ko‘rmoqda.
Massimiliano Allegri
Allegri haqida ortiqcha ta’rif ishlatishning hojati yo‘q. «MYU» ushbu murabbiy xizmatlariga qiziqish bildirayotgan yagona klub emas. Bungacha «PSJ» va «Barselona»dan ham bir necha oy avval takliflar tushganidan xabaringiz bor. Uning kuchli taktik uslubga ega ekanligi hech kimga sir emas. 53 yoshli mutaxassis «Yuventus»dagi faoliyati davomida ketma-ket besh marta «Skudetto»ni qo‘lga kiritishi bilan birga 2 marotaba Chempionlar ligasi finaligacha ham yetib bordi. Lekin Anyelli boshliq rahbariyatning yagona orzusi hisoblangan «shalpangquloq» kubok ha deganda yutilavermagach, oxiri Allegri iste’fosi e’lon qilindi. Lekin shunga qaramay u «biankonerilar» tarixidagi eng sermahsul murabbiy sifatida tarixda qoldi. Italiyalik mutaxassis qo‘l ostida jamoa 188 bahsning 142 tasida (75%) g‘alaba qozongan bo‘lib, bu klub tarixidagi eng yaxshi natija hisoblanadi. U hozir ishsiz va o‘zining navbatdagi missiyasini «MYU»da davom ettirishi mumkin.
Mourisio Pochettino
Pochettino «MYU» ko‘rib chiqayotgan nomzodlar orasida asosiy favoritlardan biri bo‘lib turibdi. Bunday deyotganimizga sabab, u bilan klub sport direktori Vudvord shaxsan bir necha marotaba uchrashishga ulgurdi. Darhaqiqat, Pochettino «Tottenhem»da ishlagan yillari mobaynida klub imidjini bir pog‘ona yuqoriga olib chiqdi. «Shporlar» aynan argentinalik mutaxassis qo‘l ostida o‘z tarixlarida eng ko‘p marotaba kuchli to‘rtlikdan joy olishgan. 18-19 yilgi YECHL finali esa avavlgi erishilgan zafarli odimlarning gultojisi bo‘ldi desak yangilishmaymiz. Va qaysidir ma’noda xotima bo‘lib jarangladi hamki, shundan bir necha oylar o‘tib murabbiy iste’fosi e’lon qilindi. Uning London jamoasiga singgan xizmatlari beqiyos. Pochetinonig salohiyatini esa 4 marta qo‘lga kiritgan oy murabbiyi sovrinlari ham belgilab berishi mumkin.
