«Manchester Yunayted» bosh murabbiyi Ole-Gunnar Sulsher Angliya chempionatining 15-turi doirasida bo‘lib o‘tgan «Lester»ga qarshi o‘yin (2:2) borasida o‘z fikrini bildirib o‘tdi.

«G‘alaba qozonmaganimizdan hafsalam pir bo‘ldi. Chunki biz juda ko‘p yaxshi vaziyatlar yaratdik. O‘yin taqdirini hal qilib qo‘yishimiz mumkin edi, ammo «Lester» – xavfli raqib, Vardi tomonida urilgan gol buni tasdiqladi.

Reshford chiroyli gol urdi, uning uchun xursandman. Qo‘ldan boy berilgan birinchi vaziyat ham ajoyib bo‘lganini u tushunib turgandi. O‘tkazib yuborilgan har ikkala gol paytida biz raqibni ertaroq yopishimiz kerak edi.

Uch kundan keyin yana maydonga tushamiz. Tiklanish uchun faqat bir kun vaqtimiz bor. Bir ochko — juda yomon natija emas, ammo kuchli raqibga qarshi o‘yinda 3 ochkoni qo‘lga kiritmaganimizdan xafa bo‘ldik», – dedi Sulsher.