"Everton" Angliya chempionatining 16-turidan o‘rin olgan "Manchester Siti"ga qarshi o‘yin boshqa muddatga qoldirilganidan norozi bo‘ldi. Klub bu borada rasmiy bayonot tarqatdi.

Eslatib o‘tamiz, uchrashuv 28 dekabr, dushanba kuni Liverpul shahrida bo‘lib o‘tishi kerak edi, ammo "shaharliklar" safida koronavirusga chalinganlar aniqlangani uchun bahs qoldirildi.

"Everton" klubi "Manchester Siti"ga qarshi o‘yin qoldirilganidan afsusda ekanini ma’lum qiladi. Uchrashuvni stadionda ikki ming, televizor orqali esa millionlab fanatlar tomosha qilishi kerak edi.

Barcha o‘yinchilar va xodimlar "Gudison Park"dagi bahsni o‘tkazishga tayyor edi. Biz bu o‘yinni intizorlik bilan kutayotgandik.

Ammo jamoamiz uchrashuvni o‘tkazishga mas’ul bo‘lganlarning xavfsizligi ta’minlanishini istaymiz. "Siti" tomonidan APLga taqdim etilgan barcha ma’lumotlarni olishni istaymiz. Nima uchun o‘yin ko‘chirilganini tushunishni xohlaymiz", – deyiladi "Everton" tarqatgan bayonotda.