Angliyada turnir jadvali yuqorisi o‘zining klassik ko‘rinishiga keldi. 20 karra chempion "Manchester Yunayted" ochkolarini 33 taga yetkazdi va 19 karra chempion "Liverpul"ga tenglashib oldi. Ular yaqin ta’qibchilaridan 4 ochko oldinda. "Liverpul" va "MYU" ma’lum vaqt inqirozga uchrashdi. Lekin, kuchli genlar baribir rol o‘ynar ekan. "Milan" misolida ham buni ko‘rishimiz mumkin. Mersesayd - Mankunian qarama-qarshiligi biz uchun nostalgiya. Fergyusson erasi aynan "Liverpul"ning Angliyadagi gegemonligiga nuqta qo‘ygandi. Klopp esa chempionlik unvonlari uchun poygani tikladi. Serning shogirdlaridan izdosh topilib MYU shon-shuxrati uchun kurashmoqchi. Ana intriga, ana o‘tkir syujet. Qanchagacha borarkin? Uzoq cho‘zilmasligi ham mumkin. Hech bo‘lmasa 17 yanvargacha teng borishsa, o‘zaro o‘ynashadi va o‘sha intriga va syujet jonli spektakl ko‘rinishiga keladi.
Hozir APLda stabillik ko‘rsatish qiyin, jamoalar tenglashgan va kuchlilar ko‘paygan. Biroq asrga teng davr mobaynida qizil rangni ingliz futboli ramziga aylantirgan bu ikki klub baribir o‘z pozisiyalariga qaytishini bilgandik, kutgandik.
