OFK klublar ishtirokidagi xalqaro musobaqalar sanasini bir necha kun ichida uzil-kesil hal etsa kerak.

Aniq bo‘lib turgani, OFK kubogining guruh bosqichi markazlashgan holatda 14-20 may kunlarida bo‘lib o‘tadi. Bungacha Chempionlar ligasining guruh bosqichi ham may oyida bo‘lib o‘tishi mumkin edi. Ammo bilishimizcha, OFK Chempionlar ligasi guruh bosqichini aprelda o‘tkazishi mumkin. Bu Ramazon oyiga to‘g‘ri keladi.

O‘zPFL Chempionlar ligasining guruh bosqichi o‘yinlarini ham may oyida o‘tkazish taklifini bildirgan. Bu bizning ichki taqvimga qulaylik yaratib berishi mumkin. Ya’ni, xalqaro maydonda O‘zbekiston sharafini himoya qilmaydigan klublar bu vaqtda O‘zbekiston kubogi uchun kurashni boshlash imkoniyatiga ega bo‘ladi.

O‘zPFL har uchala klub — "Paxtakor", AGMK va "Nasaf" xalqaro maydonda to‘p surishini ko‘zlab taklif bergan. Bu AGMK klubiga bog‘liq. Shundan kelib chiqib, barchamiz OCHL saralashida AGMK uchun muxlislik qilamiz. Biroq uning OCHL guruh bosqichida to‘p surishi yoki surmasligi va shuning barobarida "Nasaf"ning OFK kubogida yo o‘ynashi yoki o‘ynamasligi baribir aprelgacha ma’lum bo‘lmaydi (agar AGMK mart oyidagi saralashda imkoniyatni boy bermasa).

Ma’lumot uchun, o‘tgan yilning sentyabr oyida "Paxtakor" OCHL uchun Qatarga yo‘l olganida, qolgan klublar Superligani davom ettirish imkoniyatiga ega bo‘ldi. Bunga erishish uchun sentyabrning dastlabki 10 kunligida, ya’ni, Toshkentda bo‘lib o‘tgan markazlashgan ligadan keyingi kunlarda ham "Paxtakor"ni ketma-ket uch o‘yinda maydonga tushirishga majbur bo‘ldik (bu vaqtda qolgan klublar kichik ta’tilda bo‘ldi). E’tibor qiling, "Paxtakor" markazlashgan Superligada ketma-ket 4 ta, keyin 10 kun ichida yana 3 ta va undan keyin Qatarda ketma-ket yana 4 ta o‘yin o‘tkazishga majbur bo‘ldi. O‘ziga xos boksing-dey.