Marat Miftaxuddinov murabbiyligidagi «Bunyodkor» bugun navbatdagi nazorat uchrashuvini o‘tkazdi.

AGMK jamoasining o‘rinbosarlariga qarshi o‘yinda murabbiylar shtabi to‘liq ko‘rikdagi va o‘tgan mavsumda ko‘proq zaxiradan maydonga tushgan futbolchilarning xizmatidan foydalandi. 2020 yilgi mavsumda jamoaning o‘zagini tashkil qilgan o‘yinchilar bellashuvdan avval mashg‘ulotlarda qatnashdi.

«Bunyodkor» akademiyasining sun’iy qoplamali maydonida bo‘lib o‘tgan bahsda darvozalar besh bor ishg‘ol etildi. Avvaliga mehmonlar ikki to‘p farqi evaziga hisobda oldinga chiqib olishdi. Sardor Abdunabiyev va Bunyod Turg‘unboyevning gollaridan so‘ng murabbiylar shtabi tarkibda o‘zgarishlarni amalga oshirdi. O‘zgarishlarning natijasi o‘laroq tanaffusga qadar hisob tenglashdi. Valeriy Akopov deyarli bir-biriga o‘xshagan hujumni golga aylantirib dublini nishonladi. Ikkinchi bo‘limda uchinchi gol ham mehmonlar darvozasidan joy oldi. Bahodir Daminov g‘alaba goliga mualliflik qildi.

Eslatib o‘tamiz, jamoamiz navbatdagi nazorat uchrashuvini 16 yanvar kuni Pro liga vakili «Oq-tepa»ga qarshi o‘tkazadi.

O‘rtoqlik uchrashuvi
«BUNYODKOR» - AGMK (o‘rinbosarlar) – 3:2
Gollar: Valeriy Akopov (2ta), Bahodir Daminov – Sardor Abdunabiyev, Bunyod Turg‘unboyev.