Antonio Konte – zamonamizning eng kuchli murabbiylaridan biri. U “Inter”dagi ilk mavsumini qatorasiga 6 g‘alaba bilan boshladi. Yettinchi o‘yinda esa to‘xtadi. “Yuventus” to‘xtatdi uni va klubini (1:2). Birinchi bo‘lishdan boshqasini natija sifatida ko‘rmaslik qon-qoniga singib ketgan murabbiy mavsum yakunida ham o‘sha “Yuventus”ga chempionlik kurashida yengildi. O‘zi qachonlardir (2011-2014) qayta tiklagan “Yuventus”...

Bu mavsum esa “Yuventus” hozircha ortda. Ammo, “Inter” hali ham birinchi emas. Aksiga olib, oldindagi jamoaga qarab “Inter” muxlislari “bu yerda yaxshisi “Yuventus” bo‘lgani tuzuk edi”, deyishmoqda. Shahardoshlar – “Milan” peshqadam hozir A seriyada.

Stefano Pioli jamoasini bu turda “Atalanta”ga qarshi og‘ir o‘yin kutmoqda. Konte esa futbolchilari bilan “Udineze” maydoniga safar uyushtiradi. Bir vaqtda boshlanadigan bu ikki o‘yin turnir jadvalining yuqori qismiga jiddiy ta’sir etishi mumkin. Bu birinchi davraning so‘nggi turi – Italiya chempionatining o‘rtasi, ekvatori. Ya’ni, ikkinchi davraga kim yetakchi bo‘lib o‘tishi bir vaqtda boshlanadigan shu ikki o‘yinga bog‘liq. To‘g‘ri, “Milan”ning imkoniyati ko‘proq buning uchun, ammo “Inter”da kichik bo‘lsada bir umid bor. Shu umid uchun harakat qiladi Konte jamoa.
 
"Udineze" - "Inter"
Birga ko‘ramiz!
23-yanvar
Soat 22:00
Futbol TV

Orif Tolipov.