Антонио Конте – замонамизнинг энг кучли мураббийларидан бири. У “Интер”даги илк мавсумини қаторасига 6 ғалаба билан бошлади. Еттинчи ўйинда эса тўхтади. “Ювентус” тўхтатди уни ва клубини (1:2). Биринчи бўлишдан бошқасини натижа сифатида кўрмаслик қон-қонига сингиб кетган мураббий мавсум якунида ҳам ўша “Ювентус”га чемпионлик курашида енгилди. Ўзи қачонлардир (2011-2014) қайта тиклаган “Ювентус”...

Бу мавсум эса “Ювентус” ҳозирча ортда. Аммо, “Интер” ҳали ҳам биринчи эмас. Аксига олиб, олдиндаги жамоага қараб “Интер” мухлислари “бу ерда яхшиси “Ювентус” бўлгани тузук эди”, дейишмоқда. Шаҳардошлар – “Милан” пешқадам ҳозир А серияда.

Стефано Пиоли жамоасини бу турда “Аталанта”га қарши оғир ўйин кутмоқда. Конте эса футболчилари билан “Удинезе” майдонига сафар уюштиради. Бир вақтда бошланадиган бу икки ўйин турнир жадвалининг юқори қисмига жиддий таъсир этиши мумкин. Бу биринчи давранинг сўнгги тури – Италия чемпионатининг ўртаси, экватори. Яъни, иккинчи даврага ким етакчи бўлиб ўтиши бир вақтда бошланадиган шу икки ўйинга боғлиқ. Тўғри, “Милан”нинг имконияти кўпроқ бунинг учун, аммо “Интер”да кичик бўлсада бир умид бор. Шу умид учун ҳаракат қилади Конте жамоа.
 
"Удинезе" - "Интер"
Бирга кўрамиз!
23-январь
Соат 22:00
Футбол ТВ

Ориф Толипов.