O‘tgan turda Sinisha Mixaylovich murabbiyligidagi “Bolonya” “Verona”ni mag‘lub etib, 2020 yilning 29 noyabr kunidan boshlangan klub uchun og‘ir davrdan chiqib oldi. Shunday bo‘ldi-ki, hatto raqib jamoa murabbiyi ham o‘yindan keyin “Bolonya” g‘alabaga munosib o‘ynaganini tan oldi. Klub turnir jadvali o‘rtasiga (12-o‘rin) yaqinlashib, yakuniy maqsadi bo‘lgan hududlarga kelib oldi. O‘tgan mavsum 38-turdan keyin Mixaylovich klubi aynan shu o‘rinni egallagan edi. Tarkib e’tibori bilan bu jamoa Yevrokuboklar uchun kurashishi qiyin ochig‘i. Mussa Barrou, Rodrigo Palasio, Rikardo Orsolini va Lorenso de Silvestri kabi futbolchilar o‘yinda ko‘p narsani hal qiladi.

Gapni “Bolonya”dan boshladim-u, biroq hamma tushunib turibdi-ki bu jamoa autsayder. Favorit esa – “Yuventus”. “Inter”ga qarshi o‘yindagi mag‘lubiyatdan so‘ng superkubokda “Napoli”ni yengib yildagi ilk titulni qo‘lga kiritgan Pirlo shogirdlarini A seriyada hozirdanoq chempionlik kurashidan chiqarib qo‘yishmoqda. Klub yetakchidan 10 ochko ortda qolmoqda (bitta qoldirilgan o‘yini bor). "Yuventus" Ronaldu Turinga ko‘chgandan beri ilk bor chempionatda shunday murakkab vaziyatda va aynan u barcha yukni o‘z zimmasiga oladigan vaqt keldi. O‘zi shundoq ham u katta ishni bajarayotgandi, deysizmi? Albatta – ha. Biroq, endi uning qahramonliklarida qiymat 10 barobar oshadi. Krishtianu “Napoli”ga qarshi so‘nggi o‘yinda bu vazifani boshlab ulgurdi. “Bolonya” bilan ham hammasi oson bo‘lishi kerak.
 
Amalda nima yuz berishini birga ko‘ramiz!

24-yanvar, soat 16:30, Futbol TV.