Farg‘onada davom etayotgan «Hokim Kubogi» doirasida chorak finalga yo‘l olgan «Bunyodkor» ertaga Qirg‘izistonning «Nur Batken» jamoasiga qarshi maydonga chiqadi. Biz jamoamizning tajribali hujumchisi, «qaldirg‘ochlar»ni guruh peshqadamiga aylantirgan gol muallifi Shahboz Erkinovning fikrlari bilan qiziqdik.

- «Neftchi-2»ga qarshi o‘yin qiziqarli kechdi, deya olaman. Raqib safida yosh futbolchilar harakat qilgan bo‘lsa-da, bizga jiddiy qarshilik ko‘rsatishga intilishdi. Hayajon bilan to‘p surishgani ko‘rindi, ammo bolalar borlarini berib yugurishdi. Menga ularning intiluvchanligi, harakatchanligi yoqdi. E’tibor bergan bo‘lsangiz, «Navbahor farm» bilan bo‘lgan bellashuvda ham o‘yinimiz biroz qovushmagandi, «Neftchi-2»ga qarshi bahsda ham shu holat takrorlandi. Buni ruhiyat bilan bog‘liq, deb bilaman. Futbolchilar raqibga qarshi tayyorgarlik ko‘radi. Bu o‘z-o‘zidan sodir bo‘ladi. Oddiy misol, «Turon-2» aralash tarkibni maydonga tushirdi. Jamoa safida tajribali o‘yinchilar bor edi. O‘z-o‘zidan biz ham bu raqibga boshqacha kayfiyatda maydonga chiqdik va yaxshi o‘yin namoyish qildik. O‘yinimiz qovushdi, harakatlarimiz o‘xshadi. Shuning uchun buni tabiiy qabul qilsa bo‘ladi. Guruhdan chiqdik, endi buyog‘iga kuchsiz jamoalar yo‘q. Shuningdek, g‘olib musobaqani davom ettiradi, mag‘lub turnirni tark etadi. Chorak finalda Qirg‘iziston jamoasi bilan o‘ynaymiz. O‘ylaymanki, bundan keyin jiddiy raqiblarga qarshi bahslarda o‘z o‘yinimizni namoyish etishga harakat qilamiz va ko‘zlagan maqsadimizga yetamiz!