23 yanvar kuni Farg‘onada start olgan an’anaviy “Hokim kubogi - 2021” xalqaro musobaqasi poyoniga yetdi.
Kecha turnir sovrindorlari nomi ma’lum bo‘ldi. Musobaqaning uchinchi o‘rin uchun bo‘lgan o‘yinida Qo‘qonning “Qo‘qon - 1912” jamoasi Farg‘onaning “Neftchi”siga qarshi maydonga tushib, 2:0 hisobida g‘alaba qozondi. Gollarga Shohnazar Norbekov (35–daq.) va Iqbol Malikjonov (52-daq.) mualliflik qilishdi.
Final bahsida esa Toshkentning “Bunyodkor” jamoasi Farg‘onaning “Istiqlol” jamoasi bilan kuch sinashdi. Mazkur o‘yinda poytaxtliklar yirik – 4:1 hisobida zafar quchishdi. “Qaldirg‘ochlar”ning gollariga Lutfulla To‘rayev (20, 68-daq.), Farrux Ikromov (81-daq.) hamda Rasul Yo‘ldoshev (90-daq.), farg‘onaliklarning yagona goliga esa Sardor Sotvoldiyev (48-daq.) mualliflik qilishdi.
Final uchrashuvi yakunlanganidan so‘ng, musobaqa g‘oliblari taqdirlanishdi. Jumladan, turnir g‘olibi “Bunyodkor” jamoasiga oltin medal, 50 million so‘mlik sertifikat va bosh sovrin tantanali tarzda topshirildi. Shuningdek, sovrindorlar - “Istiqlol”, “Qo‘qon-1912” jamoalari futbolchilariga kumush hamda bronza medallari topshirildi.
Bundan tashqari, turnirning eng yaxshilari aniqlandi. Jumladan:
“Eng yaxshi darvozabon” - Farrux Turdialiyev (“Istiqlol”),
“Eng yaxshi hujumchi” - Shohnazar Norbekov (“Qo‘qon-1912”),
”Eng yaxshi murabbiy” - Ilhom Mo‘minjonov (“Neftchi”),
“Eng yaxshi o‘yinchi” - Anvar Hojimirzayev (“Istiqlol”) esdalik sovg‘alari bilan taqdirlanishdi.
