23 январь куни Фарғонада старт олган анъанавий “Ҳоким кубоги - 2021” халқаро мусобақаси поёнига етди.

Кеча турнир совриндорлари номи маълум бўлди. Мусобақанинг учинчи ўрин учун бўлган ўйинида Қўқоннинг “Қўқон - 1912” жамоаси Фарғонанинг “Нефтчи”сига қарши майдонга тушиб, 2:0 ҳисобида ғалаба қозонди. Голларга Шоҳназар Норбеков (35–дақ.) ва Иқбол Маликжонов (52-дақ.) муаллифлик қилишди.  

Финал баҳсида эса Тошкентнинг “Бунёдкор” жамоаси Фарғонанинг “Истиқлол” жамоаси билан куч синашди. Мазкур ўйинда пойтахтликлар йирик – 4:1 ҳисобида зафар қучишди. “Қалдирғочлар”нинг голларига Лутфулла Тўраев (20, 68-дақ.), Фаррух Икромов (81-дақ.) ҳамда Расул Йўлдошев (90-дақ.), фарғоналикларнинг ягона голига эса Сардор Сотволдиев (48-дақ.) муаллифлик қилишди.      

Финал учрашуви якунланганидан сўнг, мусобақа ғолиблари тақдирланишди. Жумладан, турнир ғолиби “Бунёдкор” жамоасига олтин медаль, 50 миллион сўмлик сертификат ва бош соврин тантанали тарзда топширилди. Шунингдек, совриндорлар - “Истиқлол”, “Қўқон-1912” жамоалари футболчиларига кумуш ҳамда бронза медаллари топширилди.

Бундан ташқари, турнирнинг энг яхшилари аниқланди. Жумладан:

“Энг яхши дарвозабон” - Фаррух Турдиалиев (“Истиқлол”),
“Энг яхши ҳужумчи” - Шоҳназар Норбеков (“Қўқон-1912”),
”Энг яхши мураббий” - Илҳом Мўминжонов (“Нефтчи”),
“Энг яхши ўйинчи” - Анвар Ҳожимирзаев (“Истиқлол”) эсдалик совғалари билан тақдирланишди.