O‘zbekistonlik 23 yoshli hujumkor yarim himoyachi Jasur Yaxshiboyev Polshaning «Legiya» klubiga o‘tdi.

Varshava jamoasi Yaxshiboyev bilan 2023 yilning 30 iyuniga qadar shartnoma tuzdi. Shartnomada uni uzaytirish mumkinligi haqida band ham bor. Jasur yangi jamoasi safida 7-raqamda to‘p suradi.

Yaxshiboyev 2020 yilgi mavsumni Belarusning «Energetik-BGU» jamoasida boshladi. Minskliklar safidagi bir davrada 14 o‘yin o‘tkazib, 9 gol va uchta golli uzatma amalga oshirgan Jasur yozda «Shaxtyor» safiga borib qo‘shildi. Mavsum yakunida Yaxshiboyev soligorskliklar safida Belarus chempioniga aylandi.

Qayd etish joiz, «Legiya» jamoasi Polsha chempionatining 2020/21 yilgi mavsumida 16 ta o‘yinda 32 ochko to‘plab, turnir jadvalida 2-o‘rinni band qilgan. Jamoa peshqadamdan 2 ochkoga ortda qolmoqda.

«Legiya»ning so‘nggi o‘yini shu yilning 6 fevralida «Rakuv»ga qarshi bo‘lib o‘tdi. Unda Yaxshiboyevning yangi klubi 2:0 hisobida g‘alaba qozongan. Oldinda yana 14 ta tur bor.

Ma’lumot uchun, «Legiya» klubi 1916 yil mart oyida tashkil etilgan. O‘z uyidagi o‘yinlarni «Voyska Polskogo» stadionida o‘tkazadi. Mazkur stadion 31 800 tomoshabinga mo‘ljallangan. Varshava klubi 14 marta mamlakat chempionligini, 19 marta mamlakat kubogini qo‘lga kiritgan. Bundan tashqari 4 bor Polsha Superkubogiga ega chiqqan.