Barchaga ma’lumki, 2021 yil futbol mavsumi uchun yangilangan klub logotipi taqdim etilgan edi va bu logotip ko‘pchilikning noroziligiga sabab bo‘lib keldi. Shu masalaga yechim topish maqsadida klub bazasida muxlislar va futbol rasmiylari o‘rtasida yig‘ilish bo‘lib o‘tdi.

Yangi logotip yuzasidan muxlislar, jurnalistlar va jamoatchilikning e’tirozlari o‘rganib chiqildi. Yig‘ilishda klubning barcha ma’muriyat xodimlari va faxriy muxlislar ishtirok etdilar. Kun tartibiga "Neftchi" PFK logotipiga o‘zgartirish kiritish to‘g‘risidagi masala qo‘yildi. Klubning ko‘p sonli muxlislari tomonidan bildirilgan fikr va takliflariga binoan, klub logotipiga o‘zgartirish kiritish kerakligi hakida gapirib o‘tildi. Yangi logotipning bir nechta nusxalari yig‘ilish qatnashchilariga taqdim etildi va ular orasidan eng ma’quli tanlandi. Yig‘ilishda qabul qilingan qarorga ko‘ra, klubning yangi logotipi tanlab olindi va bir ovozdan ma’qullandi.

Bundan buyon "Neftchi" futbol klubi bilan bog‘liq bo‘lgan barcha tadbir va matnlarda ushbu yangi logotipdan foydalaniladi.

"Neftchi" matbuot xizmati