Bugungi kunda Qatarda faoliyat yuritayotgan mutaxassis Alisher Nikimbayev qit’amizda futzal bo‘yicha jahon chempionatiga yo‘l ochadigan saralash sxemasi haqida ma’lumot berdi.

Joriy mavsum Litvada futzal bo‘yicha jahon chempionati o‘tkazilishi yodingizda bo‘lsa kerak? Mazkur turnirga saralash bosqichi vazifasini o‘tashi kutilgan Osiyo kubogi bahslari esa bekor qilindi. Xo‘sh, OFKdan JCHga boradigan jamoalar qanday aniqlanadi? OFK bu borada ikki xil variantni taklif etdi. Birinchisi - Osiyo kubogi-2018 yakunlaridan kelib chiqib, JCHda qatnashadigan 5 ishtirokchini aniqlash. Mazkur holatda qatnashchilar ro‘yxati quyidagicha ko‘rinish oladi:

Eron
Yaponiya
O‘zbekiston
Iroq
Livan

Ikkinchi variant - so‘nggi 3ta Osiyo chempionatidagi ko‘rsatkichlarni umumlashtirgan holda, eng yaxshi jamoalarni aniqlash. Ballarni taqsimlash sxemasi: chempionga - 100, vise-chempionga - 90, bronza medali sohibiga - 80..., ...8-o‘rin sohibiga - 30 ball. Ushbu variantda kuchli beshlik quyidagicha ko‘rinish oladi:

Eron - 290 ball
O‘zbekiston - 250 ball
Yaponiya - 230 ball
Tailand - 190 ball
Vyetnam - 150 ball

Futzal bo‘yicha qo‘mita a’zolari 30 martgacha variantlardan biriga ovoz berishlari lozim. Yakuniy qaror aprel oyi boshida chiqariladi. Ammo ko‘rib turganingizdek, futzal bo‘yicha O‘zbekiston termasi har qanday holatda Litva mezbonlik qiladigan jahon kubogiga yo‘l oladi. Bu esa jamoamizning mundialdagi ikkinchi ishtiroki bo‘ladi.