So‘nggi yillarda «Bunyodkor» ko‘plab yangi loyihalarni amalda hayotga tatbiq etmoqda. Xususan, oxirgi uch yil davomida Respublikamizning turli hududlarida «Bunyodkor» futbol akademiyasi filiallarini tashkil etildi. O‘z geografiyasini kengaytirishda davom etayotgan akademiyamiz bu borada yana bir qadam tashlashga yaqin. Kuni kecha Andijon viloyatiga tashrif buyurgan klub direktori Ulug‘bek Mirzayev Qo‘rg‘ontepa tumani hokimi Elyorbek Nabijonov bilan uchrashib, tumanda «Bunyodkor» akademiyasi filialini ochish bo‘yicha muzokaralar o‘tkazdi.

Rasmiylar uchrashuv davomida «Bunyodkor» akademiyasi filialiga xizmat qilishi rejalashtirilgan tumandagi «Savay» o‘yingohini ko‘zdan kechirishdi. Elyorbek Zokirovich akademiya filialining faoliyati uchun zarur bo‘lgan barcha sharoitlar yaratilishini ta’kidlab, mavjud jihozlar, maydonchalar va binolarning umumiy holatini yaxshilash bo‘yicha mas’ul insonlarga vazifalarni belgilab berdi. Tez orada Qo‘rg‘ontepa tumanida istiqomat qiluvchi bolalar millionlar o‘yiniga ilk qadamlarni «Bunyodkor» akademiyasining filiali orqali qo‘yishlari mumkin bo‘ladi. Mazkur filialimizda bolalarni futbol bilan shug‘ullanishlari uchun barcha sharoitlar muhayyo qilinadi.