Taniqli mutaxassis Alisher Nikimbayev o‘tgan hafta start olgan OCHLning yangi mavsumi haqida navbatdagi ma’lumotlarni taqdim etdi. Ushbu faktlar O‘zbekiston klublari ishtirokiga befarq qaramaydiganlar uchun ayni muddao, albatta.
* * *
- AGMKning OCHL guruh bosqichiga chiqqani bir qator ijobiy jihatlarni o‘z ichiga oladi, ulardan biri - OFK klublar reytingi. Gap shundaki, OFK kubogidagi har bir g‘alaba mamlakat jamg‘armasiga 1ta ochko olib keladi, bu OCHLdagi g‘alaba ulushidan 3 baravar kamdir. Ya’ni «Nasaf»ning OFK kubogi guruh bosqichidagi 3ta g‘alabasi ko‘pi bilan 4 ochko keltiradi: 3 - g‘alabalar uchun, 1 - «pley-off»ga chiqqani uchun. AGMK endi shu 4 ochkoni 2ta o‘yinda ta’minlashi mumkin - bittasida g‘alaba qozonib, ikkinchisida durang qayd etsa, kifoya. Bundan tashqari, olmaliqliklarda ko‘proq ochko jamg‘arish uchun guruh bosqichida yana 4ta o‘yin bor. Darvoqe, O‘zbekiston reytingda 4-o‘rinni saqlab qolishi uchun «Paxtakor» va AGMKning BAA vakillari - «Sharja» va «Shabab Al-Ahli»ga qarshi kechadigan o‘yinlari alohida ahamiyat kasb etadi. Agar jamoalarimiz amirlik vakillaridan yuqoriroq o‘rinni egallasa, 2023 yil uchun «2+2» kvotasi kafolatlanadi. To‘g‘ri, endilikda «Paxtakor» guruhida reyting nuqtai nazaridan yana bir prinsipial raqib bor - Iroqning «Al-Quva Al-Javiya»si. Shunday ekan, endi barchasi klublarimizning o‘ziga bog‘liq.
* * *
- OCHL guruh bosqichi startiga bir hafta qolgan pallada OFK Goada o‘tadigan «E» guruhi o‘yinlari vaqtiga o‘zgartirish kiritdi. Avvaliga o‘yinlar soat 17:00 va 20:30ga belgilangan bo‘lsa, endi raqamlar mos ravishda 20:00 va 22:30ga almashdi. Bundan maqsad - «Persepolis», «Ar-Rayyan» va «Al-Vahda» futbolchilariga Ramazon oyida iftorlikdan keyin maydonga tushish imkonini berish.
Alisher NIKIMBAYEV, «Futbolium»
