O‘zbekiston kubogi "F" guruhi 1-tur doirasidagi "Yangiyer" - "Qo‘qon-1912" uchrashuvidan keyingi matbuot anjumanining birinchi qismida qo‘qonliklar ustozi Baxtiyor Ashurmatov ishtirok etdi.

— Bugun “Yangiyer” jamoasida g‘alabaga bo‘lgan xohish va ishtiyoq kuchlilik qildi. Shuning hisobiga ular oxirigacha kurashib, g‘alaba qozonishdi. Mehnatlari evaziga g‘alaba qozongan “Yangiyer”ni tabriklayman.

— Jamoangiz o‘tgan turda “Metallurg” bilan bahsda ham, bugun ham oxirgi daqiqada gol o‘tkazib yutqazdi...
— Afsuski, o‘sha paytda xavfli vaziyat ham emasdi. Darvozabonlarda bunday holatlar bo‘lib turadi, kutilmaganda gol o‘tkazib yubordik. Ikkinchi bo‘limda to‘p nazorati borasida bizga nimadir yetishmadi. “Yangiyer” oxirigacha kurashdi. Natijada hisobni tenglashtirishib, oxirida g‘alaba golini ham urishdi. Kubok doirasidagi guruhda biz qiyin vaziyatga tushib qoldik. Yana ikkita o‘yinimiz bor. O‘sha uchrashuvlarda vaziyatni to‘g‘rilashimiz kerak.

— Superliga bilan Pro-liga jamoalarini taqqoslab ko‘rdingizmi? Qandaydir farqlarini sezdingizmi?
— “Yangiyer” jamoasining “Buxoro” bilan o‘yinini ham ko‘rgandik. Shuningdek, “Olimpik” klubiga qarshi uchrashuvini ham kuzatgandik. “Yangiyer”da yaxshi saviyadagi futbolchilar borligi hamda ishtiyoqi kuchliligini ko‘rgandik. Bugungi o‘yin paytida 1:0 hisobida yutayotganimizda baribir jamoamiz Superliga vakili ekanligi bilinib turdi. Keyin bo‘shashdikmi, “Yangiyer” oxirigacha kurashib, o‘zida kuch topa oldi va haqqoniy g‘alabaga erishdi. Bu mavsumda Pro-liga klublari ham yuqori saviyada o‘yin ko‘rsatishyapti. Bugungi o‘yin buni ko‘rsatib berdi. Kubok bahslarida bunday hisoblar ko‘p uchrab turadi. Boshqa chempionatlarda ham pastki liga klublari elitadagi jamoalarga qarshi boshqacha ishtiyoq bilan o‘ynashadi.

— “Mash’al” “Metallurg”ni yutdi. Qaysi jamoani guruhdan chiqishi mumkin deb o‘ylaysiz?
— Bugungi o‘yindan keyin har bir jamoada imkoniyat bor deb o‘ylayman. “Yangiyer” bugun uch ochkoni qo‘lga kiritdi. Biz qiyin ahvolga tushib qolgan bo‘lsak ham oldimizdagi ikkita o‘yinda vaziyatni to‘g‘rilashimiz kerak. Hamma klublarda imkoniyat teng.

— Jamoangizning so‘nggi oltita o‘yiniga fikringiz?
— Uyimizdagi uchrashuvlarda oxirigacha harakat qilyapmiz. Vaziyatlardan foydalana olmasligimiz qimmatga tushyapti. “Metallurg” bilan bahsda oxirida gol o‘tkazib yubordik. Yigitlar mag‘lubiyatdan to‘g‘ri xulosa chiqarishadi va keyingi uchrashuvlarga boshqacha o‘yin namoyish etishadi.