Futbol uchrashuvlari taqvimi tuzib chiqilayotgan vaqtda arafa kuni, hayit kuni kabi masalalarni darhol aniqlashtirib olishning imkoni yo‘q. Biz faqatgina Ramazon oyining ehtimoliy kunlarinigina bilamiz.

Tokio-2020 yaqinlashayotgani sayin boshqa sport turlarida lisenzion musobaqalar ko‘p. Sport-TV faqatgina futbolni ko‘rsatish majburiyatini olmagan, demak biz ham uning dasturlari bilan hisoblashishga majburmiz. Zich dasturda uchrashuvga 4-5 kun qolganda uning vaqtini o‘zgartirish ilojsiz.

Taqvimning may oyi bizga murakkab bo‘ldi. Chunki biz taqvim tuzayotganda milliy termaning FIFA belgilagan kunlardan 10 kun avval yig‘ilishini hisobga olmagandik. Ammo yakunda shunday bo‘ldi va biz taqvimni o‘zgartirdik. Ikkinchi davra taqvimini ham milliy terma o‘yinlari o‘tgunicha e’lon qilmoqchi emasmiz, chunki cheklanmagan vakolatli murabbiylar borki, keyinchalik ular baribir o‘z aytganlarida turib oladi.

Arafa yoki hayit kuniga to‘g‘ri kelayotgan futbol vaqtini "Navbahor" muxlislari surishni so‘rashyapti, boshqa klublardan bunday so‘rov kelgani yo‘q. Agar may oyining so‘nggi 10 kunligi bizning ixtiyorimizda bo‘lsa, biz balki bu kunlar arafasida futbol o‘tkazmaslik chorasini izlardik. Hozir esa bayram kunlarida futbol uchrashuvlarini ham bayram kayfiyatida o‘tkazishga majburmiz. Misol uchun yaqindagina AGMK "Surxon" bilan o‘yin kunini, "Paxtakor" "Turon" bilan o‘yin vaqtini surishni so‘rab murojaat qildi va biz ularga ham rad javobi berishga majbur bo‘ldik. Yuqorida aytilganidek, Sport-TV dasturlarini ham hurmat qilishimiz kerak.

O‘yinlar belgilangan vaqt, sana va joylarda bo‘lib o‘tadi nasib etsa. Yaqinlashib kelayotgan Ramazon hayiti barchamizga muborak bo‘lsin va shu kunlarda ham o‘tgan bir oyda bo‘lgani kabi farz amallarimizni nuqsonlarsiz ado etish nasib qilsin. Albatta futbolchilar ham oilasi davrasida bo‘lishni istaydi. Ammo ular professional va bunday holatlarga ko‘nikib ulgurgan. Muxlislarda esa uchrashuvni nafaqat stadiondan, balki TV orqali ham ko‘rish imkoniyati mavjud.

Diyor Imomxo‘jayev.