Birlashgan Arab Amirliklarida boks bo‘yicha Osiyo chempionati davom etmoqda. Kecha musobaqaning uchinchi kun janglari bo‘lib o‘tdi. Unda ringga ko‘tarilgan 6 nafar sportchimizning barchasi muvaffaqiyatga erishib, yarim final yo‘llanmasini qo‘lga kiritishdi.

Shahobiddin Zoirov (-52 kg) Afg‘oniston vakili Ramishga qarshi bahs yuritdi va 5:0 hisobidagi g‘alabani qo‘lga kiritdi.

Shuningdek, -60 kg vazn toifasida harakat qilayotgan Abdumalik Halokov tojikistonlik bokschi Abdurahmon Yoqubovni taslim etib, musobaqaning yarim finaliga chiqdi.

Yana bir o‘zbekistonlik bokschi Bobousmon Boturov (-69 kg) esa qirg‘izistonlik Nuradin Rustambek uulini mag‘lubiyatga uchratdi.

Saidjamshid Ja’farov (-75 kg) turnirdagi ikkinchi jangida qirg‘izistonlik Omurbek Bekjigit uuluga qarshi to‘qnash keldi. O‘zbekistonlik bokschi ushbu vazn toifasining to‘rtinchi raqamli vakilini taslim etib, keyingi bosqichga yo‘l oldi.

Dilshodbek Ro‘zmetov (-81 kg) qatarlik Said as-Samix Nossirga qarshi jang qildi va ikkinchi raunddagi texnik nokaut evaziga raqibini yengdi.

Bahodir Jalolovning (+91 kg) tojikistonlik raqibi Siyovush Zuxurov jangga chiqmaslikka qaror qildi va o‘zbekistonlik bokschi avtomatik tarzda yarim finalga chiqdi.

Shu tariqa, turnirga yo‘l olgan O‘zbekiston erkaklar jamoasining barcha a’zolari yarim finalga chiqishdi. Qo‘shni Qozog‘istonning 6 nafar erkak bokschisi bu bosqichga yetib kelishdi, 4 nafari esa musobaqa bilan ertaroq xayrlashishdi.