Harri Maguayr jarohati tufayli, «MYU»ning so‘nggi o‘yinlarini, xususan, Yevropa Ligasi finalini o‘tkaib yubordi. Hali ham tiklangani yo‘q, katta ehtimol bilan kamida ikki hafta maydonga tusha olmaydi. Ya’ni, Yevro-2020ning guruhdagi uchala o‘yinda ham o‘ynay olmasligi mumkin. Shunday bo‘lsa-da, Sautgeyt uni terma jamoa zayavkasidan chiqarib yubormayapti.

Qizig‘i, Maguayr shu sharoitda ham Yevroga olib ketiladigan darajada yetakchi emasdi. Masalan, ushbu mavsumda u Angliya milliy jamoasining 11 o‘yinidan 6 tasida qatnashgan xolos. Xo‘sh, nega?

Maguayrning tugagan mavsumdagi eng zo‘r o‘yinlari qaysi, bilasizmi? Menimcha, shu, «Yunayted»ning «Liverpul», «Lester» bilan, keyin Yevropa Ligasi finalidagi o‘yinlar. Ya’ni, Maguayr qatnashmagan bahslar. Paradoks shundaki, aynan shu o‘yinlarda Maguayrning «MYU»dagi ahamiyati namoyon bo‘ldi. Asosan tanqid qilingan, uning sekinligi, xatolari tilga olingan bo‘lsa, qarasak, Maguayrning fazilatlari ham ko‘p, ham muhim ekan - bosh bilan deyarli yutqazmaydi, himoyani boshqaradi, bild-ap, ya’ni, himoyadan hujumga chiqishda asosiy rolni bajaradi. Usiz «MYU» himoyasi butunlay izdan chiqar ekan. Buni ko‘rgan Sulsher ham, to so‘nggi daqiqalargacha, finalda Harrining qaytishidan umid qildi.

Esingizda bo‘lsa, Hendersonning 2019/20 mavsumida APLning eng yaxshisi bo‘lishiga fevraldagi «Liverpul» natijalari sabab bo‘lgandi. O‘shanda Hendo ham jarohat tufayli ikki hafta o‘ynolmaganda, Klopp shogirdlari Angliya kubogi va YECHLni boy bergan, APLda ham og‘riqli mag‘lubiyatlar qabul qilgandi. Odatda qora ishni qiladigan, ko‘zga tashlanmaydigan Hendersonning chempion jamoadagi o‘rni, ahamiyati bilinib, yakunda u eng yaxshi, deb e’tirof etilgandi.

Maguayrga bo‘lgan Sautgeytning, balki muxlislarning ham munosabati ham shunga o‘xshab ketadi. Qiziq tomoni, Sautgeyt hali tiklanib ulgurmagan yana bir futbolchini zayavkada ushlab turibdi. Kim?

Topdingiz, o‘sha Henderson. O‘ynamagan o‘yinlari tufayli yulduzga aylangan ikki futbolchi.

Qahramon Aslanov.