Ivisa Olich SSKA bosh murabbiyligidan iste’foga chiqarildi. 

Klubning sobiq himoyachisi Aleksey Berezuskiy moskvaliklarni vaqtinchalik boshqarib turadigan bo‘ldi.  

Rahbariyat Olich bilan hamkorlikni bekor qilish sabablarini ma’lum qilmadi. 41 yoshli mutaxassisning o‘zi esa jamoa muxlislari bilan xayrlashuvda shunday dedi:

«Klub rahbariyati bilan uchrashuv o‘tkazdim. Suhbatdan so‘ng klub hamkorlikni tugatishga qaror qildi. Asosiy sabab — ish va jamoaning kelajagi to‘g‘risida boshqacha qarash.

Natijadan afsusdaman, chunki yangi mavsumni kutayotgandim va unga katta ishtiyoq bilan tayyorgarlik ko‘rayotgandim.

SSKA klubidagi barchaga va jamoa muxlislariga sog‘lik, baxt va kelajakda muvaffaqiyatlar tilayman», — deydi Olich.

Xorvatiyalik sobiq forvard shu yilning aprel oyi boshida SSKA bosh murabbiyligini qabul qilib olgandi. Uning boshchiligida jamoa 9ta o‘yin o‘tkazib, 4tadan g‘alaba va mag‘lubiyat, bir durangni qayd etdi. 

SSKA mavsum yakunlariga ko‘ra RPLda 6-o‘rinni egalladi va 20 yilda ilk bor yevrokuboklarga chiqa olmadi. 

Olich 8 iyun kuni avvalgi ish joyi Xorvatiya milliy jamoasi murabbiylar shtabiga qo‘shilgan edi. 13 iyundan keyin  SSKAga qaytishi xabar qilingandi.