Ивица Олич ЦСКА бош мураббийлигидан истеъфога чиқарилди. 

Клубнинг собиқ ҳимоячиси Алексей Березуцкий москваликларни вақтинчалик бошқариб турадиган бўлди.  

Раҳбарият Олич билан ҳамкорликни бекор қилиш сабабларини маълум қилмади. 41 ёшли мутахассиснинг ўзи эса жамоа мухлислари билан хайрлашувда шундай деди:

«Клуб раҳбарияти билан учрашув ўтказдим. Суҳбатдан сўнг клуб ҳамкорликни тугатишга қарор қилди. Асосий сабаб — иш ва жамоанинг келажаги тўғрисида бошқача қараш.

Натижадан афсусдаман, чунки янги мавсумни кутаётгандим ва унга катта иштиёқ билан тайёргарлик кўраётгандим.

ЦСКА клубидаги барчага ва жамоа мухлисларига соғлик, бахт ва келажакда муваффақиятлар тилайман», — дейди Олич.

Хорватиялик собиқ форвард шу йилнинг апрель ойи бошида ЦСКА бош мураббийлигини қабул қилиб олганди. Унинг бошчилигида жамоа 9та ўйин ўтказиб, 4тадан ғалаба ва мағлубият, бир дурангни қайд этди. 

ЦСКА мавсум якунларига кўра РПЛда 6-ўринни эгаллади ва 20 йилда илк бор еврокубокларга чиқа олмади. 

Олич 8 июнь куни аввалги иш жойи Хорватия миллий жамоаси мураббийлар штабига қўшилган эди. 13 июндан кейин  ЦСКАга қайтиши хабар қилинганди.