Ispaniya La Ligasi chempionat formatini o‘zgartirmasligi ma’lum bo‘ldi. Bu haqda La Liga rasmiy sayti xabar qildi.
Ispaniya Qirollik federasiyasi prezidenti Luis Rubiyeles chempionat formatini o‘zgartirish bo‘yicha La Liga prezidentiga ariza bilan murojaat qilgandi. Rubiyelesning arizasiga ko‘ra, chempionatda qatnashchi jamoalarning kam o‘yin o‘tkazib, ko‘proq dam olish kuniga ega bo‘lishi, uy va mehmondagi o‘yinlarni neytral stadionda o‘tkazish masalalarini ko‘targan.
Bunga javoban La Liga rahbariyati rad javobini bergan. Unga ko‘ra, tashkilot chempionat formatida o‘zgarish qilmasligi ta’kidlangan:
«Turnir formatini o‘zgartirishni ko‘rib chiqmaymiz. Mazkur model bir necha yildan beri o‘zini oqlab keladi. Ushbu formatda translyasiya ko‘lami 20 foizga oshdi, biz ESPN telekompaniyasi bilan AQSHga televizion translyasiya yetkazish bo‘yicha kelishuvga erishganmiz. Turnirda moliyaviy barqarorlik bor va bunga o‘zgarishlar bilan putur yetkazmaymiz».
