Kecha "Futbol studiyasi"da Eldor Shomurodovning «Roma»ga o‘tishi xususida gaplashgan edik. Ulgurib qolibmiz. To‘g‘ri, u yerda qolishi haqida ham gaplar bo‘ldi. Lekin anchadan buyon yoddan ko‘tarilib ketayotgan bu mavzuni shu bugun eslaganimiz va yarim soatcha tahlil qilganimiz ayni muddao bo‘libdi.

Eldorga omad! Mourinyoga uning xeyterlari ham boshqacha qarashga majburlar endi. U terma jamoamiz hujumchisining murabbiyi. Ilgari birga rasmga tushishganida niyat ketgan ekan, shekilli, endi uning qo‘l ostida o‘ynayajak. 16 million yevro hisobida baholangan bu transferda “Roma” yutdi deb o‘ylayman. Chunki aynan Maur uslubiga mos forvard u.

Genuyaliklar libosini buyurtma berib yuborgandim, ulgurishmadi. “Roma”ning jozibali libosi yaqinda mamlakatimiz bozorlarida ko‘payib qolsa kerak, buyurtmaga ham hojat yo‘q.

Xullas, hamyurtimizni tabriklaymiz. Endi A seriya o‘yinlariga bo‘lgan e’tibor bir karra oshadi. Axir, bir tomondan - superklub, “Roma”, murabbiyi – super, hujumchisi ham superlikka intilayotgan iqtidor.

“Milan”, “Yuventus” va “Inter” muxlislariga tanlov masalasi yanada qiyinlashdi.

Xayrulla Hamidov.