Futbol TV Studiya ko‘rsatuvida ham aytgan fikrimni bu yerda yozishga va aniqroq ifodalashga urinaman. Boisi, biz studiyada mavzu bo‘yicha gaplashgach bu boradagi xabarlar yanada ko‘paydi – Eldor Shomurodov “Roma”ga o‘tishga yaqin ekan.

Menimcha, Eldor uchun hozir mavsumni “Djenoa”da boshlash bilan “Roma”da boshlash o‘rtasida katta farq yo‘q. Nega? Aksariyat muxlislar – u hozirgi jamoasiga endi ko‘nikdi, yana bir mavsum o‘ynasin shu yerda, Rimga borsa zaxirada qolishi, “Roma” va Mourinyo o‘yin uslubiga tushmasligi mumkin, deyishmoqda. Qo‘shilmayman.

Aksariyat “Djenoa”ning o‘yin uslubi farqli ekani, ular mavsumda ko‘plab o‘yinlarda ikkinchi raqam ostida o‘ynashi, bu esa Eldordan, boshqa hujumchilardan va umuman jamoadan ham ko‘p vaqtni to‘psiz o‘tkazishni talab etishini asos sifatida keltirmoqda. “Roma”da nisbatan unday emasligi rost. Biroq, men buning ziddiga boshqa fikrni qo‘yaman. Rim jamoasining yarim himoyasi juda kuchli, aytish joiz bo‘lsa, Genuya klubi yarim himoyasi bilan solishtirib bo‘lmas darajada kuchli. Hozir Nikola Dzaniolo, Genrix Mxitaryan, Amadu Diavara va Lorenso Velau kabi futbolchilar bor bu chiziqda. Eldor kabi hujumchilarga yaxshi pleymeyker juda zarur. Agar u yuqorida nomi tilga olingan futbolchilardan eng kamida biri bilan yaxshi tandem bo‘lib, bog‘lam qura olsa samaradorlik o‘sishi mumkin. Masalan, Rossiya chempionatida ham Eldor aksar jamoalar bilan birinchi raqamda harakat qiladigan “Rostov”da yo‘qolib qolmagan. Ha, daraja boshqa, ammo o‘lchovlar o‘xshash bu yerda.

Hujumda raqobat kuchli, zaxirada qolib ketadi, deyishmoqda. Bu albatta bahsli masala, Mourinyoning zaxirasida kimlar qolib ketmagan deysiz? Lekin hamyurtimizning o‘zi ham aytganidek chaqiriqlardan qo‘rqish kerak emas, ularni qabul qilib yengib o‘tish lozim.

Edin Jeko – hozircha qoladi. So‘nggi vaqtlarda unga boshqa top jamoalar masalan, “Milan” va “Yuventus” qiziqayotgani haqida mish-mishlar yurgandi. Futbolchining o‘zi esa ularni rad etib, faqat “Roma” haqida o‘ylayotgani to‘g‘risida aytgan. O‘ylashimcha, u bilan raqobat qilish mumkin. Aslida Djeko, Mayoral, Pedro, El Sharavi, Peres kabi hujumchilari bor klub millionlab yevro sarflab yana hujumchi izlamasligi kerak edi. Biroq, izlayaptimi, demak murabbiy ulardan qoniqmayapti. Nazdimda, Rim klubidagi hujumchilarning hech biri butun mavsum uchun barqaror asosiy tarkibga yuz foiz tormaydi. Boz ustiga klub ko‘p jabhada, jumladan, yangi Konferensiyalar ligasi turnirida ham kurash olib borishi lozim. O‘ylashimcha, barcha hujumchilarda o‘zini ko‘rsatish uchun imkon yetarli bo‘ladi.
 
Nima bo‘lganda ham qarorni tomonlar va futbolchining o‘zi qabul qiladi. Biz Eldorning parvozi baland va davomiy bo‘lishini istaymiz. U top chempionatda o‘zini ko‘rsatib ulgurdi. Endi navbat top jamoaga kelib qoldi, nasib!

Omad, Shoma!

Orif Tolipov.