Yozgi olimpiya o‘yinlarida ayollar o‘rtasidagi yettikurash bahslari yakuniga yetdi. Sportchilar musobaqa so‘ngida 800 metrga yugurish bahslarida ishtirok etishdi.

O‘zbekistonlik Yekaterina Voronina masofani 2:09.73 daqiqada bosib o‘tib, finishga o‘z guruhida to‘rtinchi bo‘lib yetib keldi. Bu orqali hamyurtimiz ushbu yo‘nalishda mavsumdagi eng yaxshi natijasini qayd etdi. Unga mazkur natija uchun 969 ball berildi.

Voroninaning umumiy ochkolari 6298 ballga yetdi va u 24 sportchi orasida 12-pog‘onani band etdi. Kuchli o‘nlikka kirishi uchun unga 20 ball yetmadi.

Ayollar ko‘pkurashi musobaqasida oltin medal belgiyalik Nafissatu Tiamga nasib etdi. U 6791 ochko jamg‘ardi. Kumush va bronza medallarini esa niderlandiyalik sportchilar — Anouk Vetter (6689) va Emma Ostervegel (6590) qo‘lga kiritishdi. Uchinchi o‘ringa asosiy da’vogar bo‘lib turgan belgiyalik Nur Vidts (6571) so‘nggi mashqdan so‘ng 4-o‘ringa tushib qoldi.