Kayo Xorxening shartnoma imzolashi va "Atalanta" bilan Merix Demiralning ijarasi borasida kelishib olish orqali, "Yuventus" yaqin bir necha kun ichida yana ikkita muhim vazifani hal qiladi.

Gazzetta dello Sport nashri xabariga ko‘ra, "keksa sinyora" yaqin kunlarda "Sassuolo" bilan ham Manuel Lokatelli transferi ustida muzokara o‘tkazishi rejalashtirilgan. Klublar ushbu bitim sabab uch marta uchrashgan va hali ham kelishuvga erishmagan. "Yuve" 5 million yevroga 2 yillik ijara, bundan tashqari futbolchini sotib olish uchun 20 million, qo‘shimchasiga 7 million bonus va kelgusi sotuvning 25 foizini berishni istamoqda. "Sassuolo" esa o‘z o‘yinchisi uchun 35 million yevro olmoqchi va Lokatellini to‘lig‘icha Turin klubiga sotib yubormoqchi.

Ikkinchi mavzu - Paulo Dibala. Futbolchining agenti hozir Italiyada. "Yuventus" rahbariyati bilan uchrashuv juma yoki shanba kuni bo‘lib o‘tadi.

Garchi argentinalikning yangi shartnomasi bo‘yicha muzokaralar oson kechmasa ham, tomonlar kelishuvga erishishi kutilmoqda va Dibala har mavsumda 8 million yevro, bonuslar va jami 10 million yevro ishlab oladi.