Kuni-kecha XXXII yozgi Olimpiya o‘yinlarida yuqori natijalarga erishgan sportchi va murabbiylardan bir guruhini mukofotlash to‘g‘risida O‘zbekiston Respublikasi Prezidentining Farmoni e’lon qilindi va unda O‘zbekiston og‘ir atletika federasiyasining bir qator vakillarining mehnati ham e’tirof etildi.
Jumladan, Tokio-2020 g‘olibi va rekordchisi Akbar Jo‘rayev «O‘zbekiston iftixori» faxriy unvoni bilan taqdirlandi.
Tadbirdan so‘ng, Jo‘rayev federasiya matbuot xizmatiga bergan intervyusida taassurotlari bilan o‘rtoqlashdi:
«Uzoq yillik mehnatimiz samarasiz ketmaganidan xursandman. Bu nafaqat mening, balki butun o‘zbek xalqining g‘alabasi.
Musobaqaga puxta tayyorgarlik ko‘rish uchun barcha sharoitlarni yaratib bergan yurtboshimizga tashakkur. Sportga bo‘lgan e’tibor tufayli ushbu g‘alabalarni qo‘lga kiritdik.
Olimpiada rekordini o‘rnatganimdan juda mamnunman. Shuningdek, ustozlarimga, meni qo‘llab turgan, men uchun duoda bo‘lgan barcha-barchaga rahmat aytmoqchiman.
«O‘zbekiston iftixori» faxriy unvoniga loyiq ko‘rishganidan boshim osmonga yetdi. Ushbu unvon menga qo‘shimcha kuch bag‘ishlaydi va o‘ziga yarasha mas’uliyat ham yuklaydi.
Kelgusi musobaqalarda, jahon va qit’a chempionatlari hamda Parij Olimpiadasida ham yurtimiz bayrog‘ini baland ko‘tarishga bor kuchim bilan harakat qilaman», — deydi Jo‘rayev.
