AGMK jamoasi O‘zbekiston kubogi doirasidagi navbatdagi yurishini boshlash arafasida. Jamoamiz ushbu musobaqada ketma-ket 3 yil finalga qadar yo‘lni bosib o‘tgan va bir marta bosh sovringa ham egalik qilgan. Bu gal yaxshi niyat va yuqori maqsad sari O‘zbekiston kubogi doirasida yo‘lga chiqishni maqsad qilgan. AGMK joriy mavsum kubok musobaqasida o‘z ishtirokini amaldagi g‘olib "Paxtakor" kabi nimchorak final bosqichini boshlamoqda. Qolgan jamoalar, xususan nimchorak finaldagi raqibimiz "Neftchi" ham guruh bosqichini muvaffaqiyatli yakunlab, ushbu bosqichga yo‘llanma oldi.

Bo‘lajak raqib "Neftchi" ayni damda Pro ligada ishtirok etmoqda va peshqadam jamoalar safida ketmoqda. "Neftchi" jamoasini joriy mavsumdan e’tiboran Ilhom Mo‘minjonov boshqarib kelmoqda.

AGMK va "Neftchi" jamoalari barcha musobaqalarda jami 26 marotaba to‘qnash kelishgan. O‘zaro o‘yinlardagi ustunlik farg‘onaliklar tarafida. AGMK "Neftchi" bilan o‘yinlarda 7 marta g‘alaba qozongan, 13 o‘yinda ustunlik farg‘onaliklar tarafida bo‘lgan va qolgan 6 bahsda esa durang qayd etilgan. To‘plar nisbati – 32:47, "Neftchi" foydasiga.


O‘yinni yosh hakam G‘ayrat Jo‘rayev boshchiligidagi hakamlar guruhi boshqaradi. Ushbu referi ilk bor jamoamiz ishtirokidagi bellashuvda ishlash arafasida.

Uchrashuv 19 avgust kuni Olmaliqdagi OKMK sport majmuasida soat 19:00da boshlanadi. O‘yin karantin cheklovlari tufayli muxlislarsiz o‘tkazilishi ko‘zda tutilgan.


O‘zbekiston kubogi. 1/8 final
19 avgust, payshanba.

AGMK – "Neftchi" (19:00)

Hakamlar: G‘ayrat Jo‘rayev, Sherzod Kamarov, Sardor Hakimov, Abdurashid Xudoyberganov
Nazoratchi: Rashid Aytekov
Komissar: Muhammadsodiq Sodiq-Ohunov