«Milan» himoyachisi Teo Ernandes nihoyat, Fransiya milliy jamoasiga chaqirildi. 2017 yili kuzatilgan tushunarsiz holat (u Fransiya yoshlar termasi va mamlakat futbol federasiyasi vakillari bilan aloqaga chiqmagan, qolaversa, ayni o‘sha payt OAVda do‘stlari bilan plyajda tushgan surati chop etilgandi)dan keyin iqtidorli himoyachi «qora ro‘yxat»ga tushib qolgandi. «O‘shandan buyon ko‘p vaqt o‘tdi. Hozir mutlaqo boshqa Teoman, endilikda professional ishimga jiddiy e’tibor qaratyapman. Nihoyat, terma jamoa safiga qo‘shilganimdan xursandman. Albatta, Didye Desham ishonchini oqlash yo‘lida bor kuchimni sarflayman», - dedi Ernandes L`quipe nashriga bergan intervyusida.
- Milliy jamoa chorlovi siz uchun avvalo, nimani anglatadi?
- Mamlakatning bosh jamoasiga tushish - faxr. Futbolchilar bilan tanishman. Endi milliy jamoada qolishga munosib ekanligimni isbotlash uchun ishlayman. Bunday imkoniyat tug‘ilganidan xursandman.
- Hozirga qadar umringizning katta qismini Ispaniyada o‘tkazdingiz. Qaysi mamlakat jamoasini tanlash borasida nechog‘li ikkilandingiz?
- Yo‘q, aslo ikkilanish bo‘lmadi. Chunki boshidan aynan Fransiya terma jamoasida o‘ynash va uning sharafini himoya qilishni xohlaganman.
- Endi chap qanot himoyachisi roli uchun akangiz bilan raqobatlashishingizga to‘g‘ri keladi...
- Har kimning o‘ziga xos ustun jihatlari bor. Albatta, o‘z ustimda ishlashda davom etaman. Ba’zan akam bilan hazillashaman: «Qarab tur, hali bu joyni sendan tortib olaman!» Jiddiy gapirganda, ikkimizda ham o‘zimizga xos fazilatlar yo‘q emas. Qolaversa, o‘yin uslubi bo‘yicha o‘rtamizda farq bor. Ehtimol, akamdan tezkorroqdirman, ammo unda tajriba yetarli. Umid qilamanki, keyingi safar terma jamoada birga ishlaymiz.
- Hujumkor sifatlaringiz bilan tanilgansiz...
- Tabiiyki, klubda o‘z zimmamdagi ishlarni bajaraman. Qisqasi, «Milan»da himoyaviy harakatlarni kuchaytirishimni talab qilishmoqda. Hozir 23 yoshdaman va ko‘proq intilishim kerakligini yaxshi tushunaman. Umuman, ham himoya, ham hujum masalasida mukammallik sari intilishim kerak.
M.PO‘LATOV tayyorladi
