Bugun Chempionlar Ligasi yangi mavsumi ishtirokchilaridan biri - «Atletiko» klubi haqida ma’lumot berib o‘tamiz.
UEFA reytingi (2020/21 yakuni): 6
Qanday yetib kelishdi: Ispaniya chempioni
O‘tgan mavsum: nimchorak final (mag‘lubiyat, umumiy 0:3 «Chelsi»)
Yevrokuboklardagi eng yaxshi natijasi: finalchi (1973/74, 2013/14, 2015/16)
Bosh murabbiy: Diyego Simeone
Klub boshqaruvida 10 yildan beri faoliyat olib borayotgan mutaxassis ikki marotaba Yevropa Ligasi sovrini, ikki marta UEFA Superkubogi sovrinlarini qo‘lga kiritdi va Chempionlar Ligasi finaliga ikki marotaba chiqdi. O‘tgan mavsumgi chempionlik Simeone boshqaruvidagi ikkinchi La Liga chempionati bosh sovrini bo‘ldi. Bu bilan argentinalik kuchi kamaymaganini yana bir marotaba ko‘rsatdi.
Asosiy o‘yinchi: Luis Suares
2020 yil yozgi transferlar oynasida klubga kelib qo‘shilgan urugvalik hujumchi jamoaga ruh bera oladigan xarid bo‘lganini isbotladi. U 2020/21 yilgi mavsumda chempionatda 21 ta gol urishga erishdi. Uning oxirgi goli esa klubi uchun oxirgi 7 yil ichida ilk Ispaniya chempionligini taqdim etdi.
Yozgi eng katta xaridi: Antuan Grizmann
Qarang, kim qaytdi. Fransiyalik hujumchi ikki yil oldin «Barselona»ga ketganidan keyin yana muxlislar mehrini qozonishi zarur. U shu kunga qadar, ya’ni 2014-2019 yillar mobaynida «Atletiko» safida 257 o‘yinda 133 gol urgan holda klub tarixida eng yaxshi beshinchi to‘purar bo‘lgandi. U qaytganidan keyin shunday dedi: "Maydonda va maydon tashqarisida o‘zimni baxtli qiladigan eng yaxshi joy".
O‘yinini ko‘rish kerak: Joao Felish
Endi 21 yosh bo‘lishiga qaramay klubning eng qimmat xaridi bo‘lib turgan futbolchidan albatta ko‘p narsa kutish mumkin. Shunga qaramay, o‘tgan mavsum Felish gollar soni ikki xonali raqamga aylantirdi va qobiliyati, mehnatkashligi sababli Simeonening ishonchini qozonishga muvaffaq bo‘ldi.
Bilasizmi?
O‘tgan mavsum Koke «Atletiko» tarixida Yevrokuboklarda 100 o‘yin o‘tkazgan ilk futbolchiga aylandi.
Chempionlar Ligasi yangi mavsumi ham start oldi va «matraschilar» guruh bosqichi 1-turini safarda «Portu»ga qarshi o‘tkazishdi — 0:0. «Liverpul» - «Milan» uchrashuvida 3:2 hisobi qayd etildi. Simeone shogirdlari ikkinchi turni ham safarda o‘tkazishadi. Bu safar «rossonerilar»ga qarshi.
