Tokio-2020 Olimpiadasi hisoboti va oldinda turgan kompleks musobaqalarga bag‘ishlangan yig‘ilish bo‘lib o‘tdi.

Unda MOQ raisining birinchi o‘rinbosari, O‘FA birinchi vise-prezidenti Ravshan Ermatov, Turizm va sport vazirining o‘rinbosari Avaz Karimov, O‘FA Bosh kotibi Avaz Maksumov va Qo‘mita Bosh kotibi Oybek Kasimov, MOQ raisi o‘rinbosarlari Saken Polatov va Sherzod Tashmatov, shuningdek, O‘zbekiston U21 terma jamoasi bosh murabbiyi Temur Kapadze boshchiligidagi murabbiylar shtabi ishtirok etdi.

Yig‘ilishda Temur Kapazde Parij-2024 Olimpiadasiga tayyorgarlik uchun tuzilgan «Olimpik» klubi va yoshlar terma jamoamizning faoliyati haqida to‘xtaldi.

“Keyingi yil bizni 2 ta asosiy musobaqa kutib turibdi. Bular o‘zimizda o‘tadigan Osiyo chempionati va Xanchjou-2022 Osiyo o‘yinlari. Bu turnirlar orqali jamoaning potensialiga yaqqol baho berib olish mumkin. Shubhasiz, ularda maksimal natija uchun o‘ynaymiz. Hozir jamoamizda bo‘lgan yigitlarning aksariyati avval o‘z klublarida asosiy tarkibda o‘ynashmagan. Davlatimizning qo‘llab-quvvatlashi bilan tuzilgan «Olimpik» yosh yigitlarga o‘zini ko‘rsatish uchun imkon bo‘ldi. Hozir ularga Superliga jamoalaridan ham takliflar tushmoqda”, – dedi murabbiy.

Suhbat davomida jamoaning moddiy-texnik bazasini yanada yaxshilash, futbolchilarning o‘yindagi jismoniy holatini nazorat qilishda zamonaviy texnologiyalardan foydalanish kabi masalalar bo‘yicha atroflicha fikr-mulohazalar bildirildi.