Argentinalik mutaxassis o‘zining besh yillik faoliyati davomida "Tottenxem"ni Yevropa ligasi darajasidan Chempionlar ligasi finaliga yetaklgan edi. Bu esa Yevropaning ko‘plab super klublarida hayrat uyg‘otadi. "Shporlar"ning bunday o‘sishini kuzatgan "Real" va "MYU" kabi grantlar Maurisioni ishga taklif qilishga chog‘lanishgan edi. Ko‘p o‘tmay Pochettino Londondan ketadi. Bir yildan keyin esa "PSJ" bilan shartnoma tuzadi va unga YECHLni yutish vazifasi topshiriladi. Bu maqsad uni so‘rgan boshqa jamoalarning vazifasidan keskin farq qilardi...
Pochettino ishga kelganidan boshlab yarim mavsum davomida jamoani o‘zgartira olgandek tuyuldi. U jamoasi bilan Chempionlar ligasining yarim finaliga yetib bordi. Bu yo‘lda "Barselona" va amaldagi chempion "Bavariya"ni mag‘lub qildi. Ammo so‘nggi to‘rttalik ichida Pepning lashkari bilan to‘qnashgan parijliklar holiga havas qilib bo‘lmasdi. Ular yarim finaldan qaytishga majbur bo‘lishdi. Kamiga ichki chempionatda ham yetakchilik "Lill"ga boy berildi. Jamoa bundan oldin har mavsumda Fransiya chempionligini kafolatlab kelar edi. Shunday bo‘lsa ham Poch va uning shogirdlari o‘tgan mavsumni ikkita sovrin bilan yakunlashga erishgan. Lionel Messining olamshumul ko‘chishidan so‘ng, hozir butun dunyoning ko‘zi "PSJ"da bo‘lib turibdi. Hamma jamoani Messi bilan nimalarga qodirligini isbotlashini xohlamoqda. Hozircha jamoa yangi mavsumda ikki marta mag‘lub bo‘ldi.
"PSJ"dagi aktual muammolardan biri maydondagi trio Messi, Mbappe va Neymarni birga o‘ynatish bo‘lmoqda. Ularning har biri kezi kelganda fenomenal o‘yin ko‘rsata oladi va jamoada yetakchilik qilish qobiliyatiga ega. Shu bilan birga ular himoyachi vazifasida unchalik ham ko‘rinish beravermasligi hammaga ma’lum. Bu esa, tabiiyki pressing asosiga o‘yin quradigan Pochettino falsafasiga ziddir. Yaqin yillarda transferlar uchun yuz millionlab mablag‘larni sarflovchi klub, bu yozda bir qancha tekin futbolchilarni olgani tahsinga loyiq. Bu o‘zgarishlar jamoaning ayniqsa markaziy hujumdagi kuchlar muvozanatini o‘zgarishiga sabab bo‘ldi. Xususan, Mauro Ikardi o‘ta nozik hujumchi. Mbappe esa jamoa an’analarini ifoda etmaydi. Bu narsalar klubni ayrim o‘yinlarda "tishsiz" qolib ketishga olib kelmoqda.
Sentyabr oyidagi "Man Siti" ustidan qozonilgan ajoyib g‘alabaga qaramay, bu jamoani o‘ziga kelganini anglatmas edi. O‘sha o‘yin ko‘plab mutaxassislar tomonidan "7-0-3" sxemasi asosida o‘ynalgan o‘ta pragmatik va himoyaviy bahs asifatida ko‘rildi. "Renn"ga qarshi mag‘lubiyat esa haqiqiy sharmandalik edi. Kechagi "Anje" bilan bo‘lgan o‘yinni ham kutilgandek deya olmaymiz. Jamoa asosiy yetakchilar, Messi va Neymarsiz g‘alaba qozonganiga qaramay, o‘yin nuqtayi nazaridan jamoada muammolar mavjudligi sezildi.
Pochettino o‘z o‘yinini jamoaviylikka qurishga odatlangan. Alohida yulduzlarga esa urg‘u beravermaydi. Argentinalik mutaxassis darajasi yuqoriligiga shubha yo‘q. Ammo jamoaga Messi kabi katta nom olib kelingan ekan, u orqali quriladigan hujum triosini ishga tushiruvchi, futbolga boshqa tomondan ham qaray oladigan va kuchli strategiyaga ega murabbiy zarur. Pochning qilayotgan ishlari to‘g‘ri bo‘lsa ham, o‘z falsafasiga mos keladigan tarkibga ega bo‘lishi lozim. Xususan, u o‘ng qanotda Rafinyaga tayana olmaydi, markazda esa Ander Erreraga. Shu kabi hujum vakili Ikardi ham Maurisio uchun ishonchli variant emas. Xo‘sh, unda tarkibdagi bunday chalkashliklarni kim yo‘qqa chiqara oladi?
Aytish mumkinki, Zinedin Zidan "PSJ" hozirda muhtoj bo‘lgan odamning o‘zginasi. Shuningdek, Karlo Anchelotti ham. Ular yulduzlar bilan qanday ishlashni juda yaxshi bilishadi. Pochettinoda esa o‘ziga berilgan imkon va ishonchni oqlash uchun tobora kam vaqt qolmoqda.
ingliz tilidan Jaloliddin ISMATOV tarjimasi
