Аргентиналик мутахассис ўзининг беш йиллик фаолияти давомида "Тоттенхэм"ни Европа лигаси даражасидан Чемпионлар лигаси финалига етаклган эди. Бу эса Европанинг кўплаб супер клубларида ҳайрат уйғотади. "Шпорлар"нинг бундай ўсишини кузатган "Реал" ва "МЮ" каби грантлар Маурисиони ишга таклиф қилишга чоғланишган эди. Кўп ўтмай Почеттино Лондондан кетади. Бир йилдан кейин эса "ПСЖ" билан шартнома тузади ва унга ЕЧЛни ютиш вазифаси топширилади. Бу мақсад уни сўрган бошқа жамоаларнинг вазифасидан кескин фарқ қиларди...
Почеттино ишга келганидан бошлаб ярим мавсум давомида жамоани ўзгартира олгандек туюлди. У жамоаси билан Чемпионлар лигасининг ярим финалига етиб борди. Бу йўлда "Барселона" ва амалдаги чемпион "Бавария"ни мағлуб қилди. Аммо сўнгги тўртталик ичида Пепнинг лашкари билан тўқнашган парижликлар ҳолига ҳавас қилиб бўлмасди. Улар ярим финалдан қайтишга мажбур бўлишди. Камига ички чемпионатда ҳам етакчилик "Лилль"га бой берилди. Жамоа бундан олдин ҳар мавсумда Франция чемпионлигини кафолатлаб келар эди. Шундай бўлса ҳам Поч ва унинг шогирдлари ўтган мавсумни иккита соврин билан якунлашга эришган. Лионель Мессининг оламшумул кўчишидан сўнг, ҳозир бутун дунёнинг кўзи "ПСЖ"да бўлиб турибди. Ҳамма жамоани Месси билан нималарга қодирлигини исботлашини хоҳламоқда. Ҳозирча жамоа янги мавсумда икки марта мағлуб бўлди.
"ПСЖ"даги актуал муаммолардан бири майдондаги трио Месси, Мбаппе ва Неймарни бирга ўйнатиш бўлмоқда. Уларнинг ҳар бири кези келганда феноменал ўйин кўрсата олади ва жамоада етакчилик қилиш қобилиятига эга. Шу билан бирга улар ҳимоячи вазифасида унчалик ҳам кўриниш беравермаслиги ҳаммага маълум. Бу эса, табиийки прессинг асосига ўйин қурадиган Почеттино фалсафасига зиддир. Яқин йилларда трансферлар учун юз миллионлаб маблағларни сарфловчи клуб, бу ёзда бир қанча текин футболчиларни олгани таҳсинга лойиқ. Бу ўзгаришлар жамоанинг айниқса марказий ҳужумдаги кучлар мувозанатини ўзгаришига сабаб бўлди. Хусусан, Мауро Икарди ўта нозик ҳужумчи. Мбаппе эса жамоа анъаналарини ифода этмайди. Бу нарсалар клубни айрим ўйинларда "тишсиз" қолиб кетишга олиб келмоқда.
Сентябрь ойидаги "Ман Сити" устидан қозонилган ажойиб ғалабага қарамай, бу жамоани ўзига келганини англатмас эди. Ўша ўйин кўплаб мутахассислар томонидан "7-0-3" схемаси асосида ўйналган ўта прагматик ва ҳимоявий баҳс асифатида кўрилди. "Ренн"га қарши мағлубият эса ҳақиқий шармандалик эди. Кечаги "Анже" билан бўлган ўйинни ҳам кутилгандек дея олмаймиз. Жамоа асосий етакчилар, Месси ва Неймарсиз ғалаба қозонганига қарамай, ўйин нуқтайи назаридан жамоада муаммолар мавжудлиги сезилди.
Почеттино ўз ўйинини жамоавийликка қуришга одатланган. Алоҳида юлдузларга эса урғу беравермайди. Аргентиналик мутахассис даражаси юқорилигига шубҳа йўқ. Аммо жамоага Месси каби катта ном олиб келинган экан, у орқали қуриладиган ҳужум триосини ишга туширувчи, футболга бошқа томондан ҳам қарай оладиган ва кучли стратегияга эга мураббий зарур. Почнинг қилаётган ишлари тўғри бўлса ҳам, ўз фалсафасига мос келадиган таркибга эга бўлиши лозим. Хусусан, у ўнг қанотда Рафиньяга таяна олмайди, марказда эса Андер Эррерага. Шу каби ҳужум вакили Икарди ҳам Маурисио учун ишончли вариант эмас. Хўш, унда таркибдаги бундай чалкашликларни ким йўққа чиқара олади?
Айтиш мумкинки, Зинедин Зидан "ПСЖ" ҳозирда муҳтож бўлган одамнинг ўзгинаси. Шунингдек, Карло Анчелотти ҳам. Улар юлдузлар билан қандай ишлашни жуда яхши билишади. Почеттинода эса ўзига берилган имкон ва ишончни оқлаш учун тобора кам вақт қолмоқда.
инглиз тилидан Жалолиддин ИСМАТОВ таржимаси
