Bugun U-23 Osiyo chempionatining saralash bahslari «D» guruhida o‘yinlar start oladi. «Paxtakor» stadionida O‘zbekiston Olimpiya terma jamoasi Saudiya Arabistoniga qarshi maydonga tushadi. Vakillarimiz mezbon sifatida chempionatga to‘g‘ridan-to‘g‘ri yo‘l oladi va bu saralash o‘yinlari tayyorgarlik vazifasini o‘taydi.

Ushbu o‘yinlarda, keyinchalik Osiyo chempionatida ham Olimpiyachilarimiz 21 yoshgacha bo‘lgan futbolchilar bilan ishtirok etishi haqida bosh murabbiy Temur Kapadze ko‘p bor ta’kidlagan. Sababi, jamoamizning asosiy maqsadi — Parij Olimpiadasi yo‘llanmasini qo‘lga kiritish va munosib ishtirok etishdan iborat.

O‘FA va MOQ hamkorlikda Parij-2024 sari tayyorgarlikning tizimli choralarini ishlab chiqqan holda, aynan yosh futbolchilarning bu vaqt ichida maksimal formaga chiqib borishi ko‘zda tutilgan. Futboli rivojlangan ba’zi davlatlar amaliyotida bo‘lgani kabi, O‘zbekiston olimpiyachilari ham keyingi turnirlarga U-21 tarkibi bilan borib, o‘yin amaliyotini va tajribasini oshirishga e’tibor qaratadi.