«Liverpul» yarim himoyachisi Nabi Keyta CHL guruh raundi 3-turidan o‘rin olgan «Atletiko»ga qarshi bahsda Yurgen Kloppning boshlang‘ich tarkibidan joy oldi. Shu bilan uning oxirgi 14 kunlik statistikasi aql bovar qilmas darajaga keldi: ketma-ket 5ta o‘yin. Yana turli jamoalar safida turli turnirlar, shaharlar va mamlakatlarda...
Darvoqe, Nabi Keyta yaqindagina g‘aroyib bir sarguzashtni boshidan o‘tkazgandi. Aniqroq aytsak, Gvineyada harbiy to‘ntarish bo‘ldi va mamlakat terma jamoasining Yevropa klublarida o‘ynaydigan futbolchilari chegaralar yopilgani oqibatida belgilangan vaqtda ortga qaytolmadilar. Natijada «Liverpul» vakillari Nabining Angliyaga parvoz qilishini ta’minlash uchun ancha yelib-yugurishdi. Qolaversa, Gvineya milliy jamoasi ayni shu muammo ortidan JCH-2022 saralashi doirasidagi uy uchrashuvlarini Marokashda o‘tkazdi.
Yana bir tomoni, Keyta oxirgi 2 yil davomida bunday tig‘iz taqvimda o‘ynashni hattoki, orzu ham qilmagan bo‘lsa kerak. Zero, yarim himoyachi to‘p-to‘p jarohatlarga yo‘liqqandi. Muhimi, Keyta noyob seriya ichidagi 5-o‘yinni qoyilmaqom darajada boshlab, «Atletiko» darvozasiga gol urdi. Biroq keyinchalik charchoq o‘z so‘zini aytdi, baribir: faollikni pasaytirdi, qo‘yib yuborilgan gollarda ishonchli harakatlanolmadi va tanaffusda o‘z o‘rnini zaxira vakiliga bo‘shatib berdi.
-------------------------------------
P.S.: Nabi Keyta yakshanba kuni «MYU»ga qarshi o‘yinda ham maydonga tushib, tezkor gol urdi.
