«Ливерпуль» ярим ҳимоячиси Наби Кейта ЧЛ гуруҳ раунди 3-туридан ўрин олган «Атлетико»га қарши баҳсда Юрген Клоппнинг бошланғич таркибидан жой олди. Шу билан унинг охирги 14 кунлик статистикаси ақл бовар қилмас даражага келди: кетма-кет 5та ўйин. Яна турли жамоалар сафида турли турнирлар, шаҳарлар ва мамлакатларда...
Дарвоқе, Наби Кейта яқиндагина ғаройиб бир саргузаштни бошидан ўтказганди. Аниқроқ айтсак, Гвинеяда ҳарбий тўнтариш бўлди ва мамлакат терма жамоасининг Европа клубларида ўйнайдиган футболчилари чегаралар ёпилгани оқибатида белгиланган вақтда ортга қайтолмадилар. Натижада «Ливерпуль» вакиллари Набининг Англияга парвоз қилишини таъминлаш учун анча елиб-югуришди. Қолаверса, Гвинея миллий жамоаси айни шу муаммо ортидан ЖЧ-2022 саралаши доирасидаги уй учрашувларини Марокашда ўтказди.
Яна бир томони, Кейта охирги 2 йил давомида бундай тиғиз тақвимда ўйнашни ҳаттоки, орзу ҳам қилмаган бўлса керак. Зеро, ярим ҳимоячи тўп-тўп жароҳатларга йўлиққанди. Муҳими, Кейта ноёб серия ичидаги 5-ўйинни қойилмақом даражада бошлаб, «Атлетико» дарвозасига гол урди. Бироқ кейинчалик чарчоқ ўз сўзини айтди, барибир: фаолликни пасайтирди, қўйиб юборилган голларда ишончли ҳаракатланолмади ва танаффусда ўз ўрнини захира вакилига бўшатиб берди.
-------------------------------------
P.S.: Наби Кейта якшанба куни «МЮ»га қарши ўйинда ҳам майдонга тушиб, тезкор гол урди.
