Avval xabar berganimizdek, Oʻzbekiston futbol assotsiatsiyasi tomonidan futbol tibbiyoti sohasini yanada rivojlantirish, sport tibbiyotida zamonaviy talablarga mos ravishda ishni tizimli tashkil etish maqsadida yangi Tibbiy qoʻmita tashkil etilishiga qaror qilindi.

Ushbu qoʻmita shu paytgacha bolalar futbolidagi farmakologiya, vitaminizatsiya tizimi mavjud boʻlmaganligi natijasida yuzaga kelayotgan muammolarni bartaraf etishga qaratilgan boʻlib, kelajakda yosh sportchilarimizning jismonan kuchli, kurashuvchan, bardoshli hamda fiziologik yetuk boʻlib ulgʻayishiga zamin yaratadi.

Shuningdek, bolalarimizning toʻgʻri ovqatlanishi ham rivojlanish protsessiga bevosita taʼsir qilishini inobatga olib, professional diyetologlar faoliyati ham yoʻlga qoʻyilishi belgilandi. Bu borada futboli yetuk mamlakatlar tajribasi oʻrganib chiqilib, tahlil etildi va ular misolida aytish mumkinki, tibbiy soha faoliyati futbolchilar faoliyati hamda natijalariga bevosita ijobiy taʼsir qiluvchi omillardan biriga aylangan.

Tibbiy qoʻmitadan sport meditsinasi sohasidagi yurtimizning yetuk mutaxassislari, shu jumladan farmakologiya, diyetologiya, vitaminizatsiya boʻyicha masʼullar oʻrin oldi. Qoʻmita oldiga qoʻyilayotgan maqsad mamlakatimiz futbol akademiyalari, barcha terma jamoalarida zamonaviy tibbiy yondashuvni yoʻlga qoʻyish, vaziyatni tahlil etgan holda, ishni tizimli va sifatli tashkil qilishdan iborat.