Yozgi transferning so‘nggi kunida “Milan” vinger Junior Messias bilan shartnoma imzoladi. Braziliyalik futbolchining tarixi hayratlanarli bo‘lgan, chunki u 10 yil oldin boshqa yo‘llar bilan tirikchilik qilgan va A seriyada o‘ynashni orzu ham qilmasdi. Shu sabab, “Stadion.uz” nashri “Milan”ning omadli va iqtidorli futbolchisi hayoti, hamda uning bosib o‘tgan yo‘li haqida hikoya qiladi.

“Men haqiqatan ham orzu qilmagan narsamga erishdim. Ushbu natija mashaqqatli mehnat va fidoyilik samarasidir. Hech qachon taslim bo‘lmaslik kerak”, - dedi Messias A seriya matbuot xizmatiga bergan intervyusida. Braziliyalik futbolchi bu intervyuni shu kalendar yili boshida, Italiya futboli elitasidagi birinchi mavsumida “Krotone” safidagi ajoyib o‘yinidan so‘ng bergan edi. . O‘shanda Junior kuz faslini buyuk “Milan” klubi libosida kutib olishini hali bilmas edi.

Braziliyalik futbolchi yozda tibbiy ko‘rikdan o‘tdi va Milan klubi bilan shartnoma imzoladi. Kelishuv 5,4 millionga sotib olish opsiyasi bilan 2,6 million yevroga ijara sifatida rasmiylashtirildi.

Junior Messiasning “Milan”ga o‘tishi unchalik katta ish deb bo‘lmadi, ammo futbolchining hayot yo‘li aytib berishga arziydi. Messias futbolchilik faoliyatini Kruzeyro akademiyasida boshlagan, biroq qandaydir sabablarga ko‘ra futbol maktabiga qabul qilinmaydi. 2011 yilda Junior akasi yashaydigan Italiyaga safar qildi. U o‘ziga D seriyadan jamoa topishga harakat qilib ko‘rdi. Ammo, barcha urinishlar muvaffaqiyatsiz tugadi. Shundan keyin Messias boshqa sohalardan tirikchilik qilishga majbur bo‘ldi.

“Dribling ko‘chadan, Braziliyadan boshlangan”, deb tushuntirdi Messias. - Professional klublarning yoshlar terma jamoasida o‘ynamadim, shunchaki do‘stlarim bilan vaqt o‘tkazdim. Biz erkin edik - har kim xohlaganini qilardi. Futbolning ma’nosi – g‘alaba”.

Junior qurilish maydonchasida ishlagan, keyin kir yuvish mashinalarini yetkazib beradigan kuryer bo‘lib ishga joylashdi. Messiasninng hayotida futbol faqat hobbi sifatida qolgandi. Dam olish kunlarida u “Sport Varike” muhojirlar jamoasida o‘ynadi. Bu jamoaning rivojlanishiga murabbiy Esio Rossi yordam berdi. Keyinchalik mutaxassis “Kazale” klubiga ishga joylashdi va u yerga Messiasni o‘zi bilan olib ketdi. Murabbiy bu qaroridan umuman afsuslanmadi. Sababi, Junior chempionatning 32 ta uchrashuvida 21 ta gol urdi va jamoaning D seriyaga chiqishiga yordam berdi. Braziliyalik futbolchining Italiyadagi sayohati shu tariqa rivojlandi.

“Futbolda omadim kelmaganch, qurilishga ishga kirdim. Tirikchilik maqsadida vayron bo‘lgan binolardan qolgan g‘ishtlarni. Keyinchalik quruvchi bo‘lib ham ishladim, shundan so‘ng maishiy texnika sotuvchi shirkatga – kuryer va yuk ko‘taruvchi bo‘lib ishga kirdim”, - deydi futbolchi.

2020/2021 yilgi mavsumda Junior Messias “Krotone” tarkibida ilk bor A seriyada o‘ynadi. Braziliyalik futbolchi “Yuventus”ga qarshi kechgan mavsum 4-tur uchrashuvining eng yaxshi futbolchi deb topildi. O‘sha yilda Junior A seriyada 9 ta gol urdi va 4 ta golli uzatmani amalga oshirdi. U yaxshi saviyadagi o‘yinchiga aylandi, ammo havaskorlarga xos bo‘lgan beg‘uborlik yo‘qolmadi. O‘tgan mavsumdagi o‘yinlarning birida Messiasning futbolkasi yirtilib ketdi. Bunday vaziyatda ko‘plab o‘yinchilar yangi libos kiyish uchun maydon chetiga ketishardi, Junior esa mato osilib qolmasligi uchun shunchaki tugun bog‘ladi va xuddi Italiya chempionati emas, balki maktab chempionati kabi o‘ynashda davom etdi.

Junior Messias 25 yoshida D seriyada, 27 yoshida S seriyada, 29 yoshida “Kratone” bilan B seriyadan A seriyaga o‘tdi va oliy dvizionda debyut qildi. U hozir 30 yoshda va “Milan” futbolchisi sifatida Chempionlar ligasdagi ilk golini urdi. Shuningdek, kecha “Jenoa” darvozasiga dubl qayd etishni ham uddaladi. Balki Messias “rossonerilar” lagerida ko‘zga ko‘ringan o‘yinchi sifatida tarixda qolmasligi mumkin, lekin u bosib o‘tgan yo‘li bilan hozirdanoq faxrlanishi mumkin.

“Mening hikoyam nimani o‘rgatadi? Har doim ishoning, deydi Junior. - Albatta, omad kerak, ammo qiyinchiliksiz undan hech narsa chiqmaydi. Men hech qachon o‘zimni kuchli futbolchi deb hisoblamaganman. Shuning uchun men juda ko‘p mashq qildim. Va, albatta, men Xudoga shukr qilaman. Xudo menga hamma narsa berdi. Qiyinchilik, omad, yaxshi va yomon do‘stlar... Xudoga shukur, men bilan sodir bo‘layotgan hamma narsa mantiqiydir”.

Jamshidjon Mahmudov tayyorladi.