Bugun, 4 dekabr shanba kuni Samarqand O‘zbekiston kubogi finaliga mezbonlik qiladi. «Paxtakor» va «Nasaf» o‘rtasidagi hal qiluvchi uchrashuvni kuzatish uchun ko‘hna shahrimizga Toshkent va Qashqadaryodan yuzlab muxlislar tashrif buyurishi kutilmoqda.
Samarqanddagi final yuqori darajada o‘tishi uchun tashkilotchilar katta tayyorgarlik ko‘rishgan. Soat 10:00da Registon maydonida boshlanadigan tadbirlar soat 13:00da «Dinamo» stadionidagi bayram dasturlariga ulanib ketadi. Soat 16:00da final start olsa, tanaffusda estrada yulduzi Rayhon «Dinamo» stadionida yig‘ilgan muxlislar qarshisida konsert dasturi bilan chiqish qiladi.
Shundan so‘ng Registonda kubok bilan suratga tushib, instagram ijtimoiy tarmog‘iga joylagan muxlislar o‘rtasidagi tanlov g‘oliblariga 3ta Velosiped sovg‘a qilinadi. Finaldan keyin esa taqdirlash marosimi o‘tkaziladi.
Bugun barcha yo‘llar «Dinamo» stadioni tomon olib boradi. Stadionga kirish BEPUL! Chiptalar o‘yingoh kassasida tarqatilmoqda! Marhamat!
